Antibiotico

De Biquipedia
Ir ta: navego, busca
Articlo d'os 1000
Capsulas de doxiciclina, un antibiotico.

Un antibiotico ye una substancia quimica capaz, a baixas concentracions, d'inhibir o creiximiento d'atros microorganismos u d'eliminar-los. Por un regular, os antibioticos actuan sobre eubacterias, y belluns tamién sobre rickettsias y sobre ciertos virus de gran mida, u encluso sobre celulas d'individuos pluricelulars, animals u vechetals, prevocando alteracions u d'a paret celular, u d'a membrana protoplasmatica, u d'a sintesi proteica, u d'o metabolismo d'os acidos nucleicos, etc.

Os antibioticos resultan más u menos toxicos ta las celulas humanas u d'organismos superiors. Ista toxicidat oscila entre valors altismas (actinomicina) y valors infimas (penicilina). Os antibioticos de toxicidat baixa, y encluso os de toxicidat meyana, pueden estar emplegatos en a terapeutica de muitas malautías causatas por microorganismos (eubacterias más que más). Manimenos en cada caso cal tener present o marguin de toxicidat, y veyer dica que punto as ventachas conseguitas con o tractamiento a base d'antibioticos compensan u superan as alteracions produeitas por istos.

Muit a sobén, y adintro d'uns limites razonables, o balance ye positivo a fabor d'os antibioticos. Se parla d'antibioticos con acción bacteriostatica si se limitan a inhibir o creiximiento d'as eubacterias, u bactericida, si gosan destruir-las. Manimenos en realidat, que l'acción sía eubacteriostatica u eubactericida pende a sobén más d'a dosi que no pas de l'antibiotico emplegato. Seguntes a eficacia d'un antibiotico debant de diversos microorganismos, se li puet atribuir un espectro d'acción más u menos amplo.

Os antibioticos, evidentment, han revolucionato a terapeutica d'un gran numero de malautías. Se puet decir que totas as malautías d'etiolochía eubacteriana son enclusas aintro d'as posibilidatz terapeuticas d'un antibiotico u altro, y nomás bellunas d'orichen virico u funguico en son de tot indiferents.

A medecina y a veterinaria consumen a mayor parti d'os antibioticos que actualment son produeitos. Os primers antibioticos emplegatos yeran produeitos por microorganismos como resulto d'una biosintesi especifica. Hue a mayoría d'os antibioticos son producto de sintesi y, constantment, se'n obtienen nuevos con a finalidat de conseguir un efecto antinfeccioso más eficaz y ta mirar d'eliminar a lo maximo os efectos segundarios y toxicos.