Youtuber

Felix Kjellberg (alias "PewDiePie") ye lo youtuber mas seguiu d'o mundo con mas de 100 millons de seguidors.

Un youtuber ye una persona que comparte videos a lo ret social YouTube y interaziona con os suyos subscriptors. I hai una gran variedat de youtubers, bells d'ells publican videos de moda, atras de videochuegos, de cocina u de mosica.

Os youtubers s'han convertiu en una important fuent d'información y entretenimiento pa los Millennials y la Cheneración Z.

Tipos de youtubers y videos

I hai una gran variedat de nombres pa describir os diferents tipos de youtubers y de videos que fan. Totz istes parolas son en anglés a causa d'o gran influxo d'a cultura de Estaus Unius.

Tag

O tag ye un tipo de video án os youtubers responden preguntas predeterminadas sobre un tema concreto y son penchaus a YouTube pa que los subscriptors d'a canal puedan conoixer una mica mas qué los fa goyo.

Unboxing

Os unboxings son videos án os youtubers amuestran a suya reacción a l'ubrir un paquet que ha estau ninviau, normalment per interpresas, pero a vegadas, per individuals como amigos u subscriptors d'a canal.

Vlogs

Os vlogs (u tamién videovlogs) son uns videos án s'amuestra lo día a día d'o youtuber. Istes videos son improvisaus y pretenden amostrar la suya rotina u como ye pasar un día con ells.

Hauls

En istos videos os youtubers amuestran tot lo que s'han crompau en un temps determinau y en fan una chicota resinya oral.

Tutorials

Os tutorials son videos án os youtubers amuestran paso a paso como fer una actividat.

Tours

Os tours son recorrius feitos per un puesto án se va amostrando a lo publico tot lo que i hai en aquell espacio.

what’s on my bag

En istos videos (d'o anglés con significau "qué i hai en a mía pocha") amostran lo que tien pa que lo publico pueda entender una mica mas los suyos gustos y costumbres.

Booktubers

Os booktubers son aquells youtubers que charran de libros en os suyos videos.

Gameplays

Os youtubers (que astí son clamaus "gamers") que fan videos compartindo las suyas partidas de videochuegos.

Youtubers aragoneses

Dentre los youtubers aragoneses cal destacar:

• Tiparraco, con una canal d'humor con un millón de seguidors.
• Víctor Mélida (ByViruzz), con una canal de videochuegos y mas de dos millons de seguidors.
• Teresa Sanz (Teresa Macetas), con una canal de moda de mas de 200.000 seguidors.
• Silvia Cebolla (A escuchetes), con una canal de recetas de cocina de raso en aragonés.
• Andrea Izquierdo (Andreo Rowling) con una canal de booktuber y mas de 140.000 seguidors.
• LyraGamer.