Vehíclo prioritario

Un vehíclo prioritario ye, d'acuerdo con o Reglamento Cheneral de Circulación,^[1] cualsiquiera d'os vehíclos a motor que, entre que se realiza un servicio d'urchencia, tienen prioridat de paso respective a os atros vehíclos, animals y personas en a circulación. A mas, pueden circular en ixas circunstancias por alto d'os limites de velocidat establius y son exentos de cumplir cualques normas y sinyals concretas, con a finalidat de dar cumplimiento a o servicio d'urchencia.

Vehíclos que en pueden estar

Seguntes l'articlo 67, os vehíclos siguients pueden tener a consideración de vehíclos prioritarios:

Vehíclos de servicios de policía.
Vehíclos de servicios d'extinción d'incendios; ixo ye, os bombers.
Vehíclos de protección civil y salvamento.
Vehíclos d'asistencia sanitaria publica y privada; ixo ye, as ambulancias.

En toz os casos a condición de vehíclo prioritario s'entiende ligada con a realización d'un servicio d'urchencia y siempre que o conductor faiga saber a la resta d'usuarios d'a vía que en ye, por medio d'os sinyals luminosos y sonoros a l'efecto.^[1]

Condicions

D'acuerdo con o Reyal Decreto 1428/2003 (articlos 67, 68 y 69), os conductors de vehíclos prioritarios nomás pueden vulnerar a prioridat de paso normal en as interseccions cuan, marchando en servicio d'urchencia (que s'anunciará con luces y sonería especifica), s'haigan asegurau antes que no i hai risgo d'atropello de piatons y que os conductors d'os atros vehíclos s'han aturau u s'aprestan a facilitar a marcha d'o vehíclo prioritario.^[1]

Os conductors de vehíclos prioritarios son, a mas, os solos conductors autorizaus a fer marcha-atrás y a fer meya vuelta en autopistas y autovías, a circular en sentiu contrario con a circulación normal d'ixa calzada, a dentrar en a mediana y a circular por l'arcén entre que circulan en servicio d'urchencia y siempre que no metan en periglo a atros usuarios d'ixas vías.^[1]

Os vehíclos prioritarios han de tener un sistema d'iluminación especifico, que s'autoriza la instalación por parte d'a Chefatura Provincial de Trafico que s'escaiga, y cal que sía homologau.^[1] Os sinyals luminosos son principals, pos d'els ye que se sabe que o vehíclo circula en servicio d'urchencia. Manimenos, os sinyals luminosos s'habrán d'acompanyar de sonería normalment (popularment, o que en aragonés se diz una «sirena»^[2] u un «resón^[2] / resuén»^[2]), y solo cuan omitir-la no meta en risgo a os atros usuarios d'a vía, habrá d'evitar-se de fer servir a sonería.^[1]

Comportamiento d'os usuarios de demás

Os atros usuarios d'a vía, d'enseguida perciban que s'aproxima un vehíclo prioritario en servicio d'urchencia, son obligaus a facilitar-le o paso.^[1] Normalment, ixo se fará apartando-se a l'orilla dreita d'a vía u aturando-se si estase preciso.

Se veiga tamién

Referencias

↑ ^1,0 ^1,1 ^1,2 ^1,3 ^1,4 ^1,5 ^1,6 (es) Real Decreto 1428/2003, de 21 de noviembre, por el que se establece el Reglamento General de Circulación, consultau o 6 de noviembre de 2023.
↑ ^2,0 ^2,1 ^2,2 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.

Datos: Q1308737
Multimedia: Emergency service vehicles / Q1308737

[BOE-1] 1,0 ^1,1 ^1,2 ^1,3 ^1,4 ^1,5 ^1,6 (es) Real Decreto 1428/2003, de 21 de noviembre, por el que se establece el Reglamento General de Circulación, consultau o 6 de noviembre de 2023.

[DORTO-2] 2,0 ^2,1 ^2,2 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.

[1]

[2]