Royal

A royal ye una variedat d'olivera propia d'a Sierra de Cazorla, provincia de Chaén (Espanya), orichinaria d'ista rechión. Ista variedat se destina a la producción d'aceite d'oliva virchen extra.

Extensión

A olivera d'a variedat royal s'estendilla mas que mas por as localidaz d'a comarca d'a Sierra de Cazorla, en especial por os termins municipals de La Iruela, Cazorla y Quesada. Tamién se troba, en menor mida, en a comarca de Las Villas y en a de Sierra de Segura. Ye una variedat rustica muit bien adaptada a terrenos de montanya propios d'istas comarcas (con altarias meyas de 800 m) y resistent a la sequera, trobando-se a mayoría d'éls cautivaus en rechimen de secano. S'estima que ocupa arredol d'un 6 % d'a superficie cautivada d'olivera en a comarca.

Producción

A producción d'aceite de oliva virchen extra d'a variedat royal representa o 5 % d'a producción total mundial d'AOVE. A practica totalidat d'a producción d'AOVE royal dentra en a Denominación d'Orichen Sierra de Cazorla.

En Aragón ye una variedat segundaria en l'aceite d'o Baixo Aragón, representando una proporción de no mas d'un 20%, y en l'aceite Sierra de Moncayo, a on se troba como maximo en un 5%.

Caracteristicas de l'aceite

A variedat royal ha pasau d'estar una oliva que se replegaba tardanament, en os meses de febrero y marzo debiu a la suya resistencia a o desprendimiento, a estar estimada como una variedat que produce grans aceites tempranas. Presenta una color verda intensa, muit afruitada, fresca, a on dominan as aromas a almendreta, platano, hierba y manzana. L'amargo, en contraposición a la variedat picual con a que comparte os campos en a Sierra de Cazorla, ye muit baixo, variando a intensidat d'o picant d'unas cullitas a un atras. As aceites mas tardanas d'a royal se caracterizan por un afruitau mas sinyalero, con toques de vainilla, fruitas maduras, figos ixutos... Presenta grans cantidaz de vitamina E y de polifenols.

Futuro d'a variedat

As oliveras d'a variedat royal sofrioron en as pasadas decadas un gran retacule en numero en favor d'a variedat picual, mas productiva y con mayor rendimiento graso, y por tanto mas rentable, dica deixar-la en una posición minoritaria. Ixa regresión d'a variedat royal ya s'ha aturau en l'actualidat, en estimar-se muito mas a gran calidat d'as suyas aceites tempranas, afruitadas y lucherament amargas, y en haber apuyau en os productors y consumidors os conoiximientos y cultura de l'aceite d'oliva virchen extra. Actualment se presentan en o mercau gran cantidat d'AOVEs tempranas d'a variedat royal de gama prémium, ye decir, con mayor valura anyadida.

Referencias

• Datos: Q95816459