Plantilla:Portalada/Destacato
Mississippi Burning (títol orichinal en anglés, en aragonés Mississippi ardendo, enguerada en Aragón con o títol en castellano de Arde Mississippi) ye una cinta de drama d'intriga policiaca dirichida en 1988 por Alan Parker seguntes un guión orichinal de Chris Gerolmo (basau en feitos reals), con una banda sonora orichinal de Trevor Jones y una dirección de fotografía de Peter Biziou. Producida por Frederick Zollo y Robert F. Colesberry ta la productora Orion Pictures, en l'elenco d'a cinta se troban actors como Gene Hackman, Willem Dafoe, Frances McDormand, Brad Dourif u Michael Rooker, entre d'atros.
Chris Gerolmo escribió lo guión d'a cinta en basando-se en un caso real, os asasinatos de Chaney, Goodman y Schwerner, cuan en chunio de 1964 personaches vinclaus a lo Ku Klux Klan (KKK) asasinoron a tres activistas por os dreitos civils, James Chaney, Andrew Goodman y Michael Schwerner, en a localidat de Philadelphia, en l'estau de Mississippi, con a complicidat u mesmo participación activa de miembros d'a policía local. Gene Hackman y Willem Dafoe en son os protagonistas, en interpretar a dos achents d'o FBI encargaus d'a investigación d'o caso, con l'animadversión y hostilidat d'a población local que, por motivos racistas, refirma l'actuación d'o KKK en l'asasinato.