Ordinación territorial

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Esquema grafico de lo plan urbanistico de la municipalidat d'Aerodrom, en la ciudat d'Escopia (Macedonya d'o Norte).

La ordinación territorial, ordinación de lo territorio u planificación espacial ye la planificación y aplicación espacial que cal fer con los diferents usos de lo territorio pa obtener lo millor rendimiento con las caracteristicas de lo medio reducindo tot lo posible los efectos negativos.

Planificar lo territorio suposa fer-lo servir racionalment, dedicando-ne cada zona a l'actividat mes adecuada, destinar cada puesto pa lo que ye mes apto. Con la ordinación de lo territorio se podrá sinyalar lo puesto idonios pa construir carreteras, organizar cautivos u construir viviendas. Tamién servirá pa dicir que puestos caldrá preservar, y pa elaborar mapas de risgo. La fin de la ordinación de lo territorio ye compatibilizar l'uso d'un territorio con la suya conservación y mantenimiento a largo termino, posibilitando un desembolique sostenible, evitando posibles impactos y risgos.

Una correcta ordinación de lo territorio ha de prohibir la edificación en zonas de risgo d'inundacions u destruir un espacio natural de gran valura.

La ordinación territorial se puet fer valurando la capacidat d'acollida u capacidat d'asimilación de los impactos negativos por part de lo terreno. Lo primero que s'ha de fer ye clasificar las zonas que s'estudian en unidaz ambientals homochenias. Cada unidat ambiental ha de tener unas caracteristicas uniformes seguindo criterios topograficos, cheolochicos, botanicos, d'uso humán, de paisache u de vulnerabilidat a impactos. Una vegada determinadas las unidaz ambientals se fa una matriz de capacidat d'acollida a las actividaz humanas previstas y se sinyala en cada cuadricula de la matriz lo grau d'acollida.