Ovochenesi

De Biquipedia
(Reendrezau dende Oochenesi)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Proceso d'ovochenesi, texto en anglés.

La ovochenesi ye la producción d'ovulos haploides en los ovarios a partir d'unas celulas diploides ditas ovogonias por meiosi. En la ovochenesi se succeden tres fases: proliferación, creiximiento y maturación.

La fase de proliferación consiste en la multiplicación de celulas cherminals, las ovogonias. En la especie humana se produce mientres la vida fetal, y en lo cinquén mes de chestación los ovarios ya presentan entre 6 y 7 millons d'ovogonias. Manimenos la mes gran part mueren antes de la naixetura.

La fase de creiximiento consiste en que las ovogonias augmentan de mida por l'acumulación de vitelo y se converten en ovocitos primarios diploides.

La fase de maturación consiste en que los ovocitos primarios diploides fan la meiosi convertindo-se cadagún en un ovulo haploide y tres corpusclos polars haploides. Los ovocitos primarios encomienzan la primera fase de la meiosi (meiosi I) a la fin de la chestación, pero s'atura en la profase I de la primera división meiotica.

Cuan naixe una nina presenta en los suyos ovarios uns dos millons d'ovocitos primarios. En la pubertat primerenca cuan encomienzan los primers ciclos menstruals lo numero d'ovocitos primarios y foliclos ovaricos s'ha redueito a uns 400.000.

En cadagún de los ciclos menstruals se produce primero lo desembolique d'un grupo de foliclos y se reanuda la primera división meiotica que s'heba aturau en los ovocitos primarios, no plegando-ne a la fin que un. Lo resultau ye que bi ha dos celulas haploide de diferent mida: un corpusclo polar y un ovocito secundario.

Una vegada que s'ha formau l'ovocito secundario encomienza la meiosi II u segunda división meiotica orichinando dos celulas haploides: un ovulo y atro corpusclo polar. Lo primero corpusclo polar, (que s'ha orichinau en l'anterior meiosi I), puet dividir-se tamién por meiosi II, por lo que lo numero total de corpusclos polars puet plegar a tres. En los mamifers, amfibios, reptils y bels peixes la meiosi II se completa enantes de la fecundación y lo que los ovarios liberan a l'oviducto son ovocitos secundarios. En las aus la meiosi II remata en lo mesmo inte de la ovulación.

Bibliografía[editar | modificar o codigo]