Metodo scientifico

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

O metodo scientifico ye o estudeo sistematico, controlato, empirico y critico de proposicions hipoteticas sobre presuntas relacions entre diferents fenomenos naturals y ye o mecanismo emplegato en as sciencias experimentals ta convalidar u invalidar una teoría, por meyo d'a experimentación u d'a observación.

Son dos os pilars basicos d'o metodo scientifico. O primero d'ellos ye a reproducibilidat, ye dicir, a capacidat de repetir un determinato experimento en qualsiquier puesto y por qualsiquier presona. Ista pila emplega t'a suya practica, esencialment, a comunicación y a publicidat d'os resultatos obtenitos.

O segundo pilar ye a falsabilidat. Ye dicir, que toda proposición scientifica ha de tener a posibilidat de ser falsata. Isto implica que se pueden disenyar experimentos que en o caso de dar resultatos diferents a los previstos negareban a hipotesi que s'ha posato a prueba.

En l'actualidat os resultatos d'a investigación scientifica son publicatos en revistas scientificas especializatas dimpués de criticas u comentarios d'atros espertos, correccions por parti d'os autors y encara verificación d'os experimentos por atros equipos d'investigación. A lo mesmo tiempo, ye encomenzando a estar usual que se publiquen en o rete (Internet) a lo tiempo que en as revistas scientificas.

O metodo scientifico s'adapta de trazas diferents seguntes a sciencia. En cheolochía historica no pueden fer experimentos porque o proceso ye més largo que a vida d'o investigador, l'obchecto puet estar més gran que qualsiquier laboratorio, y os procesos pasatos irrepetibles en as mesmas condicions. En cuenta de fer-se-ie experimentos se fa experiencia en os prencipios basicos, que permiten comparanzas con feitos actuals y experimentables.