Ilesia Greco-Catolica

De Biquipedia
Ir a la navegación Ir a la búsqueda

Ilesia Greco-Catolica ye un termin que fa referencia a las ilesias con liturchia y rito griego pero que admiten l'autoridat d'o Papa de Roma. Son ilesias esgallatas d'a Ilesia Ortodoxa en diferents intes d'a historia, a sobén son conoixitas como "ilesias uniatas" u "ilesia uniata", termin que s'aplica sobre tot a las ilesias greco-catolicas d'os países eslavos.

Orichen[editar | editar código]

Entre os ortodoxos d'os países rutens se producen conversions a lo calvinismo y lo catolicismo, lo que fa que en 1596 se reuna una asambleya de lo clero en Brest-Litovsk en a que deciden aceptar l'autoridat d'o Papa de Roma pero conservando o rito bizantín. L'asambleya de 1596 de clero ortodoxo y de fidels proclama a unión con a ilesia catolica. D'os ueito bispes se n'oposan dos, pero no son tenitos en cuenta por o metropolitán de Kiev. Amanix una ilesia uniata que reconoix l'autoridat d'o Papa pero mantién o rito bizantín, dito tamién griego.

En 1620 o patriarca de Costantinoble consagra un metropolitán en Kiev y tamién bispes d'a ilesia ortodoxa orichinal. O rei de Polonia se vei obligato a reconoixer-los en 1632, d'una manera que bi ha dos hierarquías paralelas, a ortodoxa y a "uniata". O nuevo metropolitán Per Mohila encomienza una nueva "contrarreforma" ortodoxa.

En 1649 os rutens de l'Alta Hongría, actual Rutenia Subcarpatica fundan una ilesia uniata.

En Transilvania amaneixerá a Ilesia Uniata d'Alba Iulia en 1698.

O Imperio Ruso s'esforzará por reintegrar as ilesias uniatas d'os ucranians en a ilesia ortodoxa dica baixo amenaza asinas como va ganando territorios a costa d'os polacos-lituans. En Galitzia os ucranians podrán mantener-sen en a Ilesia Uniata por estar baixo sobiranía austriaca y no rusa. En 1946 Stalin fará con a Ilesia Uniata o mesmo que facioron os zars, de modo que dimpués d'a segunda guerra mundial os gobiernos sovietico, rumán y checoslovaco adscribioron as ilesias uniatas a la ilesia ortodoxa. En as zagueras decadas han estato reconstruitas china chana.