Faro de Lekeitio
O Faro Santa Catalina de Lekeitio ye un faro que se troba situato aintro d'o termin municipal de Lekeitio (País Vasco), en o Cabo de Santa Catalina.[1] Amán d'o faro bi ha una capiella d'o mesmo nombre an i van os familiars d'os pescataires quan bi ha temporals.[2]
Historia
Se devantó en l'anyo 1862 sobre una torre conica de base octogonal de 13 metros d'altaria a 46 metros sobre o ran d'o mar en o cillo d'o Cabo Santa Catalina. Fue un prochecto d'Amado Lázaro, estando subastau en 1861 en 22.825 reyals. Ista obra se fació ta dar servicio a lo trampo costero no cubierto por os faros de Zumaia y Matxitxaco. Enchegando-se a suya lampa por primera vegada o 15 de noviembre de 1862.[3]
En 1935 s'enampla o suyo abasto a 12 millas gracias a l'instalación d'acetilén que substituye a la lampa de petrolio que i heba, encara que mantien a optica y a linterna. Por as freqüents boiras, en 1956 s'instaló una bocina electrica con 6 millas de radio d'actuación.[4]
Con as obras d'electrificación y reforma de 1957 que se i fación, que recreixioron a torre y cambeyoron a optica y a lampa, o faró adhubió lo suyo abasto actual de 24 millas. Dimpués d'ista intervención, a iluminación pasó a fer grupos de lampadiadas blancas (1 más 3) cada 20 segundos. Mientres que a bocina lo feba en tongadas de 4 sonius en letra L Morse cada 20 segundos.
En l'anyo 1975 se cambeó de nuevo a luz, que deixó d'emitir a lampiadas ta fer-lo con una luz contina, encara que chiratoria.[5]
En l'anyada 2010 li se realizoron unas obras d'esviellamiento, con un coste de 2,7 millons d'euros d'inversión, que rematoron con a reinauguración d'o faro o 26 de marzo de 2010 como Centro d'Interpretación d'a Tecnolochía d'a Navegación, esdeveniendo d'ista traza en o primer faro vesitable d'o País Vasco. [6]