Fonetica

Plantilla:Grafía 87 A fonetica (d'a parola griega φωνή foné, "sonito", "boz") ye o estudio d'os sonitos articulatos per a boz umana. S'adedica a analizar as propiedaz d'os sonitos d'o parlache (u fonos), debez que a suya produczión, audizión e perzepzión, a diferienzia d'a fonolochía, debotata t'o estudio d'os sistemas de sonitos e t'as unidaz de sonitos astractas (como los fonemas). A fonetica estudeya os sonitos de traza indibidual més que no es contextos a on que s'usan, sin que i interbiengan discusions semanticas.

Seguntes l'Asoziazión de Fonetica Internacional, ibi ha més de zien fonos diferens, reconoixitos como distintibos e transcritos en o suyo amplamén usato Alfabeto Fonetico Internacional.

Brancas d'a fonetica

A fonetica puet estallar-se en tres brancas prinzipals:

• fonetica articulatoria, que estudeya los sonitos orals describindo los organos que interbienen en a suya produczión;
• fonetica acustica, que estudeya los sonitos orals den d'una anvista fisica;
• fonetica perzeptiba, que estudeya la descodificazión d'a parla.

Estoria

A fonetica ya yera una demba estudiata a l'antica India, abe 2.500 años, quan o gramatico Pānini fabló d'o puesto e d'as trazas d'articulazión de consonans en o suyo tractato d'o sanscrito en o sieglo V aC. Os prinzipals alfasilabarios indicos de l'actualidat, fueras d'o tamil, ordinan as suyas consonans seguntes l'antica clasificazión de Pānini.

En o mundo oczidental muderno, o primer fonetista estió lo danés J. Matthias, autor d'o tractato De Litteris (1586). O matematico anglés John Wallis, mayestro de surdomutos, estió lo primer a clasificar as bocals seguntes o suyo punto d'articulazión (1653). L'alemán C. F. Hellwag imbentó lo trianglo bocalico en 1781. Diez años dimpués o fisico austriaco Wolfgang von Kempelen imbentó una maquina que preduziba sonitos. O medico alemán Hermann Helmholtz enzetó lo estudio d'a fonetica acustica. L'abat francés Jean Pierre Rousselot estió lo primero a imbestigar en a demba d'a fonetica esperimental e escribió es Principes de phonétique experimentale, que se publicoron entre os años 1897 e 1908.

En o sieglo XIX, a fonetica empezipeya a estudiar-se den d'un anglo diferén. Jan Baudouin de Courtenay atraza la teoría d'o fonema, que remata formulando lo fundador d'a escuela estructuralista, o suizo Ferdinand de Saussure. En a escuela d'a fonetica descriptiba e articulatoria, i treballa lo espanyol Tomás Navarro Tomás, qui escribió Manual de pronunciación espanyola. O suyo desziplo Samuel Gili Gaya publicó en 1961 Elementos de fonética general. En os Estatos Unitos, o lingüista Leonard Bloomfield e l'antropologo Edward Sapir contribuyoron de trazas dezisibas t'a teoría fonetica, mientres que o creyador d'o Zerclo de Praga, o ruso Roman Jakobson, desembolicó la teoría d'as caracteristicas unibersals de toz es sistemas fonemicos.

A Espanya, a escuela de fonetica conta con dos linias de treballo prinzipals: a estructuralista, que represienta Emilio Alarcos Llorach con a obra Fonología Española, publicata en 1969; e l'acustica, representata per Antonio Quilis, colaborador d'o fonetista danés Bertil Malmberg, que publicó Fonética y fonología del espanyol en 1963. Plantilla:Destacato