Cuniestra

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Esquemas d'a formación d'una cuniestra en a sierra de Guadarrama (Espanya).

Anvista d'o Big Drift, en primer plan, una cuniestra de 30 metros de gordaria en o Parque Nacional de Glacier en Estaus Unius.

Una cuniestra, cuniastra, cunyestra, conchesta u conchestra ye una zona en a montanya, por eixemplo en un clotau, a on s'acumulan grans masas de nieu Etimolochicament proviene d'o verbo latino congero que significa "acumular".

Istas zonas quedan protechidas, de manera que o viento i envolturna a nieu. En as cuniestras, mientres as turmentas de nieu se i acuniestran gordarias muit grans de nieu.

Pueden mesmo cubrir bells obstaclos y tornar-se periglosos por o suyo peso u por meter en periglo a circulación y atras actividatz humanas.

Formación

A formación de cuniestras pende no nomás d'a nieu en o suelo, d'a que caye y d'a portiada por o viento, sino tamién d'a temperatura y d'os tipos d'as pelocanas. En efecto, una nieu muit densa u muit compactada será muit dificil de deseparar y alzar. Con temperaturas muit fredas, o viento devanta a capa superficial ta formar cuniestras mientre un cierto tiempo, pero a compactación puet creyar una crosta superficial encara más dificil d'erosionar. Quan a temperatura ye amán d'o punto de fusión as pelocanas absorben más vapor d'augua de l'aire circumdant cosa que aumenta a suya masa y a suya resistencia a o viento. Quan a temperatura plega u sobrepuya 0 °C a nieu se regala parcialment cosa que fa aumentar a suya densitat y aumenta a suya cohesión fendo imposible a suya devantada.