Circo d'Ip

O circo d'Ip ye un circo glaciar d'o Pireneu aragonés situau a l'este d'o río Aragón, estando as suyas auguas tributarias d'iste río. O barranco d'Ip, por a on baixan as auguas d'o circo dica o río Aragón, desemboca entre os lugars de Canfranc y os Aranyons.

Talment lo mas conoixiu d'iste rincón ye l'ibón d'Ip, un ibón entibau en o mesmo circo.

As cimas mas importants que lo forman, que tienen altarias d'arredol d'os 2.700 m, son, de norte a sud, os picos d'a Tronquera (2.666 m), a pala d'Ip (2.779 m), a punta Escarra (2.748 m), a punta de l'Aguila (2.681 m), o pico Bucuesa u pala Alcanyiz (2.765 m), penya Nevera (2.721 m), Collaradeta (2.729 m) y Collarada (2.884 m). En l'extremo occidental d'o cordal d'a pala d'Ip se troba a Moleta (2.572 m).

Rotas

L'acceso mas común se fa por un sendero que remonta tot o barranco dende o lugar de Canfranc.
Un atra opción ye puyar-ie por un comodo sendero PR dende os Aranyons por as laderas d'o mont Larrón (2.131 m) dica a pista d'o carretón d'Ip, restas d'as infraestructuras que s'emplegoron ta a construcción de l'entibo. Ista pista mos deixa en a mesma entibadera.