Chuegos Olimpicos de l'Antigüidat
.jpg)
Los Chuegos Olimpicos de l'Antigüidat (griego antigo: Ὀλυμπιακοὶ Ἀγώνες, romanizau: olympiakoi agōnes) estioron una serie de competicions atleticas organizadas normalment cada cuatro anyos y siempre en la ciudat de Olimpia en l'Antiga Grecia, a partir de l'anyo 776 aC dica l'anyo 393, y yeran disputadas per representants de diversas polis griegas. No se tractaba nomás que d'un escaicimiento esportivo a on se celebraban prebas esportivas so que se tractava d'un acto festivo a on l'esporte yera un elemento mas en un conchunto d'actos que incluyiban l'homenache y lo culto a los dioses d'o panteón griego.
Os atletas que participaban en os Chuegos Olimpicos heban de cumplir bellas condicions ta poder fer-lo: representaban a las suyas ciudaz respectivas y heban d'estar hombres libres (ye decir, no heban d'estar esclavos) y heban de poseyer plena ciudadanía griega. D'atra man, cal parar cuenta que cuan os mesaches libres griegos plegaban en o suyo dotzeno anyo d'edat dentraban a fer parte d'a clmada palestra, a on se lis ensenyaba a templar os suyos niervos y a desenrrollar a suya musculatura y que a la edat de 16 anyos dentraban en o chimnasio a on i feban exercicio fisico y practicaban atletismo ya sía en as instalacions propias d'o chimnasio ya sía en os campos y las selvas de l'arredol. Cuan cumpliban os 20 anyos se consideraba que heban rematau a suya etapa de formación fisica, se lis entregaban armas convertindo-los en posibles soldaus d'a suya polis y finalment dende ixe momento se los consideraba aptos ta participar en os Chuegos Olimpicos.
As prebas esportivas que se i celebraban varioron con os anyos, estando inicialment diferents tipos de cursas atleticas u de carros, pero poquet a poquet s'introducioron atras como la luita libre, lo pentatlón antigo, lo brinco de largaria u las tiradas de chavalina y de disco.
O periodo de cuatre anyos entre chuegos yera (y ye conoixiu encara hué) como olimpiada, y mientres la celebración d'a competición se promulgaba la ékécheiria u tregua olimpica pa permitir a los atletas viachar en condicions de seguranza dende las suyas ciudaz dica Olimpia.
Los zaguers Chuegos Olimpicos de l'Antigüidat se celebroron en l'anyo 393, cuasi doce sieglos dimpués d'os suyos comienzos.[1] Dimpués de l'adopción d'o cristianismo como relichión oficial de l'Imperio Romano y con o edicto de Tesalonica (27 de febrero de 380 dC) de l'emperador Teodosio I, se prohibió tota celebración pagana, estando incluyius en ista prohibición os Chuegos Olimpicos.
Historia
[editar | modificar o codigo]L'orichen d'os Chuegos Olimpicos se troba fa alto u baixo 3.000 anyos en una ciudat de l'Antiga Grecia, Olimpia. O sistema politico griego d'ixas envueltas no yera lo d'un país unificau, so que lo d'un conchunto de ciudaz-estau independients entre sí y que a sobén yeran enfrontinadas entre ellas, mesmo con guerras.[2]
En iste contexto de dispersión politica se prencipioron a celebrar cuatre Chuegos Panhelenicos que se celebraban en cuatre ciudaz diferents (Olimpia, Delfos, Isthmia y Nemea) y que basicament consistiban en celebracions de tipo relichioso en as que se reuniban participants d'as diferents ciudaz-estau en una celebración en a honor d'os dioses d'o panteón griego, en compartir todas as ciudaz-estau un mismo sistema de creyencias relichiosas.[2]
Entre toz os Chuegos Panhelenicos, os Chuegos Olimpicos eixemplificaban clarament o pinaclo d'a excelencia y d'o prestichio y representaban perfectament os valors d's cultura griega que yeran compartius y nexo d'unión entre toz os griegos. Y ye por ixo que los Chuegos Olimpicos se celebraban en Olimpia, un santuario sagrau ta los griegos en a ciudat-estau d'Elis en o Peloponiso y en honor d'o dios supremo d'a mitolochía griega, Zeus.[2][3]
Iste festival relichioso-esportivo se celebraba cada cuatre anyos (clamando-se lo periodo de ixos cuatre anyos entre una y atra celebración una olimpiada), fendo-se entre 776aC y 393dc y atrayindo a numbrosos atletas y a mils d'espectadors procedents de todas as ciudaz griegas. Os atletas prencipiaban o suyo entrenamiento 10 meses antes d'a celebración de l'evento y s'agrupaban en delegacions que ninviaba cada ciudat en os Chuegos. Os Chuegos Olimpicos comportaban una treugua en as posibles guerras u hostilidaz entre ciudaz griegas.[4]
O programa de prebas esportivas s'enampló con o tiempo, introducindo-se prebas como lo diaulos (dos vueltas a la pista), dolichos (luenga distància), luita, pentatlón, boxeyo, cursas de caballos y de cuadrigas, y lo pancracio (u combat sin armas).[5]
O recinto d'Olimpia
[editar | modificar o codigo]Olimpia, en l'Antiguidat, yera la siede d'un important santuario y amás lo puesto an se celebraban los Chuegos Olimpicos. Se troba a lo piet d'o mont Cronio y en o costau dreito d'o río Alfeo. En l'actualidat ye un puesto arqueolochico situau en a unidat periferica de Élide.
Referencias
[editar | modificar o codigo]- ↑ (en) Ancient Olimpic Games, en a web d'o Comité Olimpico Internacional-
- ↑ 2,0 2,1 2,2 (en) A. Miah y B. García: The Olympics: The Basics. Abingdon, Oxon: Routledge, 2012. ISBN 1136472908.
- ↑ (en) J. Swaddling: The Ancient Olympic Games, Austin, University of Texas Press, 1988.
- ↑ (en) V. Girginov: The Olympics. A Critical Reader. Abingdon, Oxon: Routledge, 2005, p. 40-49. ISBN 0415445353.
- ↑ (en) Michel Scott: Delphi and Olympia. Cambridge University Press, 2014, p. 378. ISBN 9781107671287.
Vinclos externos
[editar | modificar o codigo]
Se veigan as imáchens de Commons sobre os Chuegos Olimpicos de l'Antigüidat.
| Control d'autoridaz |
|
|---|
Datos: Q188468- Multimedia: Ancient Olympic Games / Q188468