Cantar de mio Cid
O Cantar de mio Cid ye un cantar de chesta anonimo que relata proezas heroicas inspiradas librement en os zaguers anyos d'a vida d'o caballero castellano Rodrigo Díaz de Vivar, conoixiu como o Cit Campiador. A versión conservada fue composada, seguntes a mayoría d'a critica actual, arredol de l'anyo 1200.
Se tracta d'a primera obra poetica extensa d'a literatura castellana y o solo cantar epico d'a mesma conservau quasi completo; solament s'han perdiu a primera fuella de l'orichinal y atras dos en l'interior d'o codice, encara que o conteniu d'as lagunas existents puede estar deduciu d'as prosificaciones cronísticas, en especial d'a Cronica de vinte reis.
Amás d'o Cantar de mio Cid, os atros tres textos d'o suyo chenero que han perdurau son: as Mocedades de Rodrigo —circa 1360—, con 1700 versos; o Cantar de Roncesvals —ca. 1270—, un fragmento d'uns 100 versos; y una curta inscripción d'un templo romanico, conoixida como que Epitafio épico d'o Cid —ca. 1400?—