Tsunami
Un tsunami (d'o chaponés tsu, "puerto" u "badía", y nami, "onda marina"; literalment significa gran onda en o puerto) ye una onda marina u un conchunto d'ondas de gran enerchía que son producitas quan bell fenomén extraordinario esplaza verticalment una gran masa d'augua. Se calcula que o 90% d'istos fenomens son prevocatos por tierratremos, en o qualo caso se les diz, mas concretament, tsunamis tectonicos. A enerchía d'un maremoto pende d'a suya altaria (amplaria d'a onda) y a suya velocidat. A enerchía total escargata sobre una zona de costa tamién penderá d'a cantidat de picos que leve o tren d'ondas (en o Tsunami de l'Ocián Indico habió 7 picos). Ista mena d'ondas rechira una cantidat d'augua muito superior a las ondas marinas superficials producitas per l'aire.
