Obsolescencia programada

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Se denomina obsolescencia programada u obsolescencia planificada a la determinación u programación d'a fin d'a vida útil d'un producto u servicio, de traza que, dimpués d'un periodo de tiempo calculau previament por o fabricant u por a empresa entre a fase de disenyo de dito producto u servicio, iste se torne obsoleto, no funcional, inutil u inservible.

Orichen

Se considera que l'orichen se remonta a 1932, cuan Bernard London proposaba rematar con a Gran Depresión lucrando-se a costa d'a sociedat a traviés d'a obsolescencia planificada y obligada por lei (encara que nunca se faciera). Manimenos, o termin fue popularizau por primera vegada en 1954 por o disenyador industrial estadounidense Brooks Stevens. Stevens teneba previsto dar una charrada en una conferencia de publicidat en Minneapolis en 1954. Sin pensar-lo muito, utilizó o termin como títol ta la suya charrada.

A etapa inicial d'a obsolescencia programada se desembolicó entre 1920 y 1930, cuan a producción en masa empecipia a creyar un nuevo modelo de mercau. Amás, países d'o tercer mundo se fan servir como vertedero de toz istos productos inservibles; o que ye chenerando una considerable contaminación y destrucción d'o paisache en ditos países.

Tipos d'obsolescencia

Obsolescencia de components electricos y electronicos

O procedimiento gosa estar o siguient: un d'os aparatos electronicos d'uso habitual falla. Cuan o duenyo lo leva a reparar, en o servicio tecnico le dicen que resulta mas rentable mercar uno nuevo que apanyar-lo.

Obsolescencia de software

A obsolescencia programada en o software prencipia en que o fabricant empenta a os consumidors a renovar/actualizar a suya versión de software a causa de que no se continará con as actualizacions d'este y o respectivo suporte tecnico. Un software que no disfrute d'actualizacions periodicas sufrirá eventualment d'obsolescencia a causa de que se queda dezaga en comparanza a la tecnolochía dichital por o que se deixan de desembolicar aplicacions pa este.

Muitas vegadas o software discontinuau ye clamau abandonware. Ye asinas como os programadors de software "entiban" aldredes o suyo propio software con a finalidat de motivar a o consumidor a mercar a nueva versión ya que, encara que os nuevos programas que introducen podrán leyer o conteniu d'as versions anteriors, una versión antiga no podrá leyer os fichers d'o nuevo sistema. Eixemplo d'isto estió a discontinidat d'o sistema operativo XP por parte de Microsoft o cual deixa en o camín a la obsolescencia a o sistema operativo ya que como comunica Microsoft, de seguir emplegando Windows XP se podrían presentar vulnerabilidaz en a seguredat de l'equipo debant de menazas como lo son os virus.

Avantallas y inconvenients

As estimacions d'obsolescencia programada pueden influir en as decisions d'una empresa sobre a incheniería de producto. Por tanto, a empresa puede utilizar os components menos costosos que satisfaigan as procheccions de tot o ciclo de vida d'o producto.

Amás, pa las industrias, a obsolescencia programada estimula la demanda por medio d'o incentivo a os compradores pa treballar baixo presión y asinas mercar en un periodo anterior si encara quieren un producto que funcione. Istos productos se pueden mercar a o mesmo fabricant (una pieza de recambio u un modelo nuevo), u a un competidor que tamién dependa d'a obsolescencia programada. Mas que mas en os países desembolicaus (an muitas industrias ya s'enfrontinan a un mercau saturau), ista tecnica ye a ormino necesaria pa que os productors mantiengan o suyo livel d'ingresos.

Entre que a obsolescencia programada ye atractiva pa os productors, tamién puede fer un danyo significativo a la sociedat en forma de externalidaz negativas. De contino substituindo, en cuenta de reparar os productos, istos creyan mas residuos y contaminación, espleitan mas recursos naturals y se traducen en un mas gran gasto en o consumo. A obsolescencia programada puede alavez tener un impacto negativo sobre o medio ambient en o suyo conchunto. Mesmo cuan a obsolescencia programada podría aduyar a salvar os escasos recursos por unidat producida, tiende a augmentar a producción total, ya que a causa d'a lei d'ufierta y demanda, disminuye en o coste y o pre finalment se traducirá en augmentos de demanda y consumo.

Manimenos, os impactos ambientals negativos d'a obsolescencia programada penden tamién d'o proceso de producción.

Tamién existe a posible reacción d'os consumidors que paran cuenta de que o fabricant ha invertiu diners pa fer o producto obsoleto mas rapido; istos consumidors podrían cambear a un atro productor (si ye que existe) que ofreixca una alternativa mas duradera.

Controversias d'a obsolescencia programada

Teoricament o mercau, por medio d'a libre competencia, habrá de producir os biens d'a mas alta calidat pa o consumidor a o menor coste posible en o largo plazo.

Manimenos, existe una contradicción intrinseca en iste concepto, ya que o mercau requiere que o productor, con a finalidat de mantener-se competitivo, disminuya os suyos costes en todas as fases d'o proceso de producción (coste-eficiencia). Isto usualment se traduz en o pago de salarios minimos, externalización pero tamién en l'uso de materials de menor calidat, pobre disenyo. A isto se le puede denominar obsolescencia intrinseca.

O segundo problema ye que garra producto puede permitir-se una vida útil mayor a la necesaria pa mantener o ciclo de consumo. A causa d'ixo se planifica a ‘caducidat’, falla u danyo d'un producto dimpués d'un periodo especifico, isto ye obsolescencia planificada u programada propiament dita.

Cuan se quieren imposar sancions por meyo de lechislación a la obsolescencia planificada, a estratechia adoptada por as empresas ye enmascarar-la dentro d'o que hemos denominau obsolescencia intrinseca, suprimindo u ignorando nuevas tecnolochías que podrían suposar un producto mas duradero, sostenible u amigable con l'ambient.

A obsolescencia programada consiste en fer descartable o que por a suya esencia no'n ye. Se tracta d'una estafa de bels sectors deshonestos d'a industria (especificament d'a tecnolochía dichital) que fan deliberadament pereceders os productos que podrían estar duraders, con l'obchectivo que l'usuario los descarte y merque atros nuevos que tamién durarán un tiempo amugau, y asinas se pase a vida; mercando, usando y descartando.

Os productos dichitals son os obchectos en os cuals a obsolescencia programada s'evidencia con mayor magnitut. Cuasi toz os components dichitals d'ordinadors, en cuenta d'estar duraders y reparables, son descartables.

Manimenos, a radiz d'o problema contina estando en a industria mesma: os reparadors troban dificultaz como unidaz selladas imposibles de desarmar y rearmar, unidaz fabricadas seguindo un proceso automatizau que, en reproducir-lo manualment con fins de reparación, cheneran un coste de man d'obra mayor que o coste d'o producto nuevo, u bien, dreitament a imposibilidat d'aconseguir repuestos, ya siga porque nunca no han saliu a la venda como tals u porque deixoron de fabricar-se seguntes o calandario d'obsolescencia programada que siguió a unidat.

Se veiga tamién

Datos: Q1967458
Multimedia: Planned obsolescence / Q1967458