Libre albitrio
O libre albitrio ye a hipotetica capacidat d'os achents racionals de poder eixercer control sobre as suyas accions.
Afrontar ista qüestión ha requiesto comprender a relación entre a libertat y a causa, asinas como conoixer si as leis d'a naturaleza son causalment deterministicas. As diversas posturas filosoficas sobre o tema difieren en a suya opinión sobre si totz os escaicimientos son determinatos u no – determinismo contra indeterminismo – asinas como en si a libertat puet coexistir con o determinismo – compatibilismo contra incompatibilismo. Asinas, os deterministas convencitos argumentan que l'universo ye deterministico, y que ixo fa que o libre albitrio sía imposible.
O prencipio d'o libre albitrio tien connotacions relichiosas, eticas y scientificas. Por eixemplo, en l'ambito relichioso, o libre albitrio puet significar que una deidat omnipotent no eixerce o suyo poder sobre as voluntatz y eleccions individuals. En etica, puet significar que os individuos pueden estar responsabilizatos moralment por as suyas accions. En l'ambito scientifico, puet significar que as accions d'o cuerpo, encluyendo-ie o cerebro y a mente, no son de tot determinatas por a causalidat fisica. A qüestión d'o libre albitrio ha estato un tema central dende os prencipios d'o pensamiento filosofico.
