Estatua d'a Libertat

A estatua d'a libertat

A Estatua d'a Libertat u «Libertat iluminando á lo mundo» (en anglés Statue of Liberty e Liberty Enlightening the World, respeutibament) ye un d'os molimentos más famosos de Nueba York, d'os Estatos Unitos e de tot o mundo. Ye situata en Nueba York, sobre a chicota isla de Liberty Island (Isla d'a Libertat), á lo sudeste de Manhattan, en a desembocadura d'o río Hudson e amán d'a isla Ellis. Estió un obsequio de Franzia en o sieglo XIX por a zelebrazión d'o zentenario d'a independenzia d'os Estatos Unitos e un sinno d'amistanza entre as dos nazions, e fue inaugurata o 28 d'otubre de 1886 con a presenzia d'o, por ixas embueltas, president d'os Estatos Unitos Grover Cleveland. O molimento se combirtió en un simbolo de biemplegata á los immigrants europeus que plegaban á lo nuebo continent buscando libertat e oportunidaz, ya que á sobén yera o primero que beyeban dimpués de trabesar l'ozián Atlantico, asinas como un simbolo unibersal d'a libertat. Fue reyalizata por o escultor Frédéric-Auguste Bartholdi e, o incheniero franzés Gustave Eiffel diseñó a estrutura interna. L'arquiteuto franzés Eugène Viollet-le-Duc s'encargó d'a eslezión de l'arambre emplegato ta la construzión d'a estatua. O 15 d'otubre de 1924, fue declarata molimento nazional d'os Estatos Unitos e o 15 d'otubre de 1965 se i adibió a isla Ellis. En l'año 1984, fue declarata Patrimonio d'a Umanidat, por a UNESCO. En l'año 2005, rezibe, chunto con a isla Ellis, un total de 4.235.595 besitas.

Mundialment, a Estatua d'a Libertat ye un d'os iconos prenzipals que s'asozian á los Estatos Unitos; á más de estar un molimento important d'a ziudat de Nueba York, se combirtió en un simbolo d'Estatos Unitos e representa, la libertat e a emanzipazión respeuto á la opresión. Arquiteutonicament parlando, a estatua remera á lo famoso Coloso de Rodas, una d'as siet marabiellas d'o mundo». Fue nominata ta las «siet nuebas marabiellas d'o mundo», á on que resultó finalista. Dende o 10 de chunio de 1933, o suyo manteniment corre á cargo de l'almenistrazión Serbizio de Parques Nazionals d'os Estatos Unitos.