Follín

Emisión de grans cantidaz de follín per as chamineras d'un camión diesel.

O follín (tamién dito fullín) ye un conchunto de particlas solidas de mida chicota de composizión predominant de carbonio que se son despresas de materials ricos en ixe elemento cuan se creman, tals como la matiera, leña u lo carbón. Tiene l'aparienza pareixita d'a zenisa, pero con color de regular més fosca que no ésta.

No ye mica estraño de trobar-lo en grans cantidaz en as chamineras, cremallos e calders esposatos á l'azión d'o fuego, e tamién las surtitas de combustión d'as calderas. Per a suya color negra, ye un d'os colorants més antigos emplegatos ta dar-le ixa colorazión á os materials, e per ixo encara enguán se gosa produzir á escala industrial como colorant, con calderas lur chamineras d'estrazión tienen dispositibos espezials ta la captazión d'esta material. Un d'os nombres comerzials d'o follín como colorant ye negro de humo.

Os gases d'escape d'os motors que emplegan combustible diesel tamién gosan dipositar follín en as conduzions per on amaneixen, perque pueden contener idrocarburs asorbitos, fetos prenzipalment de lubricants e restas de combustible no cremato. Á demés, tamién pueden contener restas d'altras sostanzias solidas como osidos de metals e compuestos sulfuratos.

Tamién se i solen trobar grans cantidaz d'esta material á dintro d'os transformadors de potenzia eletrica que son refricheratos con azeit dieletrico dimpués que i aiga pasato un azident. Ixo ye perque l'apariello posei matiera en a parte interior e cuan lo fallo eletrico produze garra arco boltaico, éste preboca que l'azeit se creme deixando-ie las ditas cantidaz de follín en as paretes interiors d'a cuba d'o transformador.

Enrastres esternos

• O Biquizionario tien una dentrada sobre follín.