Reggio Calabria

Reggio di Calabria (prenunciato /ˈrɛʤ:o ˌdikaˈlabrja/; Rrìggiu en dialecto reggino; Righi en griego de Calabria; Ρηγιον, Reghion en griego), mas asobén dita Reggio Calabria, u simplament Reggio en tot o sud d'Italia, ye a primera ciudat calabresa por antigüidat, amplaria cheografica y numero d'habitants. Ye capital d'a provincia de Reggio Calabria y seu d'o Consello rechional de Calabria. Con una población humana de 186.937 habitants (2007) ye o deciueiteno municipio más poblato d'Italia.

O territorio municipal -definito a prencipios d'o sieglo XX y dito "Gran Reggio"- se troba en o centro d'una gran aria metropolitana de quasi 368.000 habitants que comprende a-saber-los municipios entre Bagnara Calabra y Melito di Porto Salvo y dica l'Aspromonte.

Reggio ye en o centro d'un aria toristica d'importancia historico-cultural y balniaria, ye una ciudat universitaria, y amás ye situata en o centro d'una zona agricola particularment fértil gracias a lo clima templato, con producción d'aceite d'oliva, vin, citricos y hortalicias. Tamién ye tipica la producción d'a esencia de bergamotto, citrico que nomás se cautiva en iste territorio y que ha esdevenito un d'os simbolos d'a ciudat.

Igual que muitas atras ciudatz d'o "Mare Nostrum", en a cultura local de Reggio gosa identificar-se como lo centro exacto d'a mar Mediterrania, feito por que muitas y milenarias culturas a traviés d'a historia han formato parti d'a cultura y lo esprito d'os habitants de Reggio.

Tradicionalment li s'ha dito a Reggio a "Ciudat d'a Fata Morgana" ya que se hi produce o raro fenomen optico-mitolochico d'a Fata Morgana, en que pareixe que a costa siciliana se troba a bells poquetz metros, podendo veyer-se incluso casas y presonas.

Molimentos

• Museu Nacional. A suya colección d'antigüidatz prehistoricas y d'a Magna Grecia ye una d'as más importants d'Italia, destacando los famosos bronzes de Riace.
• Castiello aragonés. Se construyó a prencipios d'a Edat Meya ta esfender a los habitants de Reggio d'os sarracins y lo transformoron os aragoneses a meyatos d'o sieglo XV.

Vinclos externos

• Se veigan as imáchens de Commons sobre Reggio Calabria.