Colla Chobenil d'a Fabla
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
A Colla Chovenil d'a Fabla yera una asociación chovenil fundada en Zaragoza en 1980 ta esfender, reivindicar y promover l'aragonés en Zaragoza. Os suyos fundadors estioron chovenalla que procedeba d'os ambients que coincidioron en a ideya de treballar por l'aragonés. D'una man chent que procedeba d'o mundo d'a izquierda, vinculada a la JGRA (Choven Guardia Roya d'Aragón) como Fernando Romanos, Andrés Tello, Michel Valiente, Gregorio Martinez y chent independent que s'achuntaba en o colechio d'Agustinos de Zaragoza, como Juanjo Gaudioso, Francho Vicente, Francho Beltrán, Lorién Majarena. Dimpués, a os fundadors s'achuntó mas chent como Luis Gayán, Ricardo Arguís, Ricardo Párraga "Chiri", Toñin Navarro, Roberto Serrano, Pilara López y Ramón Lambán.
As primeras accions estioron reivindicativas y de difusión, pero tamién principioron a fer cursos d'aragonés en a Casa de Choventut de Ciudat Chardín de Zaragoza y ficar una mesa informativa y de venta de materials en aragonés en o centro de Zaragoza toz os domingos, en conciertos y fiestas. Tamién editoron o boletín Rebellar feito en aragonés y con una tirada de 300 eixemplars reivindicaba y difundiba l'aragonés.
A seu d'a Colla Chovenil d'a Fabla estió en primerías en a carrera Borderas de Zaragoza, an que o PTA (Partido del Trabajo de Aragón) teneba a suya seu, dimpués amprón en o Partido Socialista de Aragón, una seu en a carrera Canfranc de Zaragoza.
Participoron como miembros en a Chunta d'Aduya a ra Fabla Aragonesa coordinadora que achuntaba a las asociacions que alavez triballaban per l'aragonés y que fayó una replega de firmas refirmando un manifiesto d'aduya a la fabla aragonesa.
En Chinero de 1980 empecipión as primeras reunions en o barrio de San Chusé, pa decidir o nombre, as primeras accions y a forma de dar-se a conoixer. Estas accions estioron reividicativas y de difusión, pegallos, cartels, pintadas, murals, mesas informativas. Tamién facioron os primers cursos en a casa de choventut de ciudat chardín y empecipioron a treballar en un diccionario de pocha que dimpués editarían baixo o logo d'o Ligallo de Fablans de l'Aragonés. Editoron o boletín Rebellar y participón en manifestacions aragonesistas con pancartas y en a coordinadora Chunta d'Aduya a la Fabla Aragonesa.
En chinero de 1982, dimpués de dos anyadas de funcionamiento, facioron un documento de treballo que plantiaba como primera linea de treballo d'esta asociación integrar-se en o consello d'a fabla aragonesa y fer un "ligallo d'o consello en Zaragoza" fendo fuerza en a difusión, meyos de comunicación, amostranza y reivindicación.
En febrero de 1982 facioron una conferencia ta debatir o treballo feito y as posibilidaz de futuro, allí se vió a necesidat de treballar dillá de l'ambito chovenil, contactar con fabladors patrimonials que viviban en Zaragoza y contar con a estructura legal ta poder funcionar de forma eficaz, lo cual, levó a os fundadors y a mas chent que se les heba iu achuntando, a formar en l'anyada 1982 una asociación cultural legalizada, o Ligallo de Fablans de l'Aragonés.