Windsurf

Dos windsurfistas tot competindo.

O windsurf ye un esporte de vela en que se fa desplazar una tabla con una botavara por l'augua. O suyo nombre proviene d'as parolas anglesas "wind" (viento) y "surf" (navegar), y ye un esporte prou moderno y que no se troba en o programa olimpico.

A diferencia d'un velero, a vela d'una tabla de windsurf s'articula permitindo a suya rotación libre arredol d'un unico punto d'unión con a tabla: o piet de mástel. Isto permite de manipular a vela librement en función d'a dirección d'o viento y d'a posición d'a tabla. A vela se manipula por o windsurfista a traviés d'a botavara (en anglés "boom" u "wishbone").

Se'n organizan competicions locals, rechionals y mundials en que prima a velocidat y a tecnica. Se puet practicar tot l'anyo con traches de neopreno.

Equipación

Una equipación de windsurf ye composada por:

• Vela: Empenta a tabla por a diferencia de presión existent entre os dos costatos d'a mesma debito a la diferent velocitat con la que l'aire cercula por os dos cantos.
• Mástel: Puet estar d'una pieza u deseparato en dos y tien por misión unir a vela a la tabla y mantener un perfil adecuato d'a vela.
• Piet de mástel: Composato por una chunta de tipo cardan por un regular de bel tipo de goma que se puet doblar en totas as direccions. A suya misión ye unir a vela a la tabla y transmitir a ista a fuerza chenerata por o viento en a vela.
• Botavara: Formata per dos tubos (uno en cada amura d'a vela) unitos por un extremo a o palo (punyo d'amura) y por atro a la vela por meyo d'un cabo (escota).
• Tabla: Composata mas que mas por esbruma de polietileno recubierta de resina epoxy. A suya largaria (eslora), forma y amplaria (manga) varía seguntes a especialitat esportiva a la que va enfocata, rango de viento ta que se troba disenyata y peso d'o navegant. A suya misión ye aconseguir o millor eslizamiento posible sobre l'augua y dencima d'ella va puyato o navegant.
• Carena, aleta u alerón: Va amán d'a popa y evita a deriva en navegación de planeyo.
• Orza abatible: A misión ye evitar a deriva d'a tabla a baixa velocidat (cuan no s'ha plegato a la velocidat de planeyo). Ye opcional y nomás las portian as tablas de desplazamiento de grans dimensions.
• Arnés: Emplegato por o navegant ta penchar-se d'a botavara a traviés d'uns cabos y aduya a evitar a cansera muscular.
• "Footstraps" u cinchas de subchección ta os piez: Tien a finalidat de subchectar a o windsurfista a la tabla y evitar que caiga cuan travesa as ondas d'a mar y a mas le permite fer maniobras diversas.
• Adaptador: Se coloca entre a botavara y o mástel ta tener mas adherencia.

Vinclos externos

• Se veigan as imáchens de Commons sobre o windsurf.

• Datos: Q191051
• Multimedia: Windsurfing / Q191051