Verbos irregulars acabaus en -yir

De Biquipedia
Ir a la navegación Ir a la búsqueda
Verbos irregulars
en aragonés

Por diftongación d'a radiz

Acabaus en -iar (no freqüentativos)
Acabaus en -iar (freqüentativos)
Acabaus en -nyer u -nyir
Acabaus en -uir
Acabaus en -ducir

Con epentesi antihiatica
Acabaus en -yer
Acabaus en -yir

Participios fuertes
Pasaus perfectos fuertes

Os verbos irregulars acabaus en -yir perteneixen a la tercera conchugación pero presentan una conchugación irregular comparable con os verbos irregulars con epentesi antihiatica.

Son verbos d'esta conchugación fuyir, muyir, freyir, oyir (actualment quasi sustituito de tot por sentir), reyir, y esleyir (d'uso medieval).

Estos verbos comparten provenir d'un etimo latín con una consonant oclusiva sorda -d- u -g-, que se manteneba en fases primerencas d'a evolución fonetica de l'aragonés, y que mesmo se siente encara en variants arcaizants como l'aragonés centro-oriental u d'as vals d'o Pireneu Axial, pero que dimpués desapareixió.

  • RĪDĒRE > redir (conservato en belsetán, chistabín, benasqués y atras parlas) > reyir.
  • FRĪGĔRE > freyir.
  • COLLIGĔRE, por derivación ELLĔGĔRE > esleyer/esleyir (d'uso medieval).
  • BRŪGĔRE[1] > bruyir.
  • FUGĔRE > fuyir (en benasqués tamién fuire).
  • MULGĔRE > *MUGERE > muyir (en benasqués tamién muire).
  • AUDĪRE > odir (conservato en ansotán) > oyir.

Estos verbos d'a conchugación en -ir han desembolicato una -y- epentetica en o infinitivo talment por analochía con os verbos irregulars con epentesi antihiatica, con os que comparten formas presonals con -y-, (fuyes, fuyen), u por dreitament por analochía con estas formas presonals.

Ciertos verbos irregulars de rechistro culto acabaus en -ir que en aragonés medieval s'escribiban asobén con -d- intervocalica u sin ixa -d- como concluir (concludir en aragonés medieval, visible en a actas de Cortz d'Aragón y en o "Libro d'el Trasoro"[2]), d'o latín CONCLUDERE), excluir, incluir, recluir, pueden ser incluitos en este grupo, y d'alcuerdo con as normas ortograficas podrían escribir-se concluyir, excluyir, incluyir y recluyir por provenir d'un etimo latín con -d- intervocalica perdita y documentar-se a forma concluyir en os "Fueros d'Aragón",[3] y a forma conclluyí(r) en benasqués.[4]

Vitalidat de l'uso[editar | editar código]

Os textos medievals no siempre representaban a -y- epentetica d'os infinitivos, por eixemplo beluns d'os libros de Chuan Ferrández d'Heredia,[5] y veyemos fuyr, oyr, ecetra. En as parlas altoaragonesasactuals a -y- epentetica ye desapareixendo, y as formas d'estos verbos converchen con as equivalents castellanas. Fa ya unas quantas decadas filologos d'a viella escuela como Tomás Buesa Oliver y Manuel Alvar podioron rechistrar presencia de verbos acabaus en -yir en o semontanés occidental[6] ayerbense y en o chaqués.[7]

Cada verbo presenta circunstancias y variants especials:

  • O verbo oyir ye poco documentato en aragonés medieval (quasi siempre s'escribe oir u oyr), y en aragonés actual y castellán d'Aragón se documenta en a Plana de Uesca[8] y en Sarinyena.[9]
  • O verbo esleyir/esleyer/esleir ye un semicultismo d'uso medieval y corresponde a la voz patrimonial Lir d'a Sierra de Luna y significa "deseparar unas ovellas". Esleyir ye sustituito por o verbo castellán elegir dando o hibrido vulgarizato eslexir/eslegir. En aragonés escrito d'a primera decada d'o sieglo XXI s'ha quiesto rearagonesizar-la correctament como eslechir, sin prener-lo dreitament d'o latín, ni tampoco recuperando o semicultismo aragonés medieval. Prenendo-lo dreitament dende o latín como cultismo daría elechir.
  • O verbo reyir ye documentato en o semontanés occidental[6] ayerbense y en o chaqués,[7] pero no se gosaba fer servir en a prebatina d'aragonés standard de fins d'o sieglo XXI, yera muito més común fer servir arreguir, propio de l'ansotano y cheso, y talment analochico con as formas presonals de present de subchuntivo y a primera presona d'o present d'indicativo. A forma arcaica redir se documenta en aragonés d'o Viello Sobrarbe, belsetán, chistabín, benasqués y baixorribagorzán de Torres. Presenta a forma sin pronombres (yo rido muito) y a forma con pronombre reflexivo acompanyata de en/ne (te veigo fer fatezas y ya me'n rido).

Present d'indicativo[editar | editar código]

Presenta una irregularidat en a primera presona singular.

Present d'indicativo
Muigo
Muyes
Muy(e)
Muyimos
Muyitz
Muyen

En a primera presona singular d'o present d'indicativo acababan en -yo en aragonés medieval (encara se troba en a literatura alchamiata), pero cambeó ta -igo en la evolución ta l'aragonés moderno. D'egual traza que tenemos yo muigo, tenemos tamién yo fuigo, yo freigo y yo oigo.

En a tercera presona singular de lo present d'indicativo bi ha variacions seguntes zonas:

  • ell muye / ell mui
  • ell fuye / ell fui
  • ell friye

Las formas sin -e final responden millor a la fonetica aragonesa, pero tienen una distribución más redueita. Son usuals en chistabín.

Pasato perfecto simple[editar | editar código]

Presenta una irregularidat por sumar-se a -i d'o diftongo -ie- d'as formas regulars, (partié, sintié) a la consonant -y- d'a radiz; tamién muitas vegatas s'escribe a -i-, por analochía con a conchugación regular, pero que no representa una diferencia de pronunciación.

Pasato perfecto simple
Muyé / Muy
Muyés / Muyiés
Muyó / Muy
Muyemos / Muyiemos
Muyetz / Muyietz
Muy(or)on / Muyi(or)on

En Panticosa se documenta a forma oyé[8] d'a primera presona singular d'o verbo oyir, que no en totz puestos se puet rechistrar por cayer en desuso este verbo en muitos puestos.

Present de subchuntivo[editar | editar código]

Igual que en la primera presona de present d'indicativo, las formas de present de subchuntivo prenen totas -ig- en la mayor parte de l'aragonés:

Present de subchuntivo
Muiga
Muigas
Muiga
Muigamos
Muiga
Muigan

Cherundio[editar | editar código]

O cherundio d'estos verbos ye regular muyindo u irregular muindo.

Participio[editar | editar código]

Ta más detalles, veyer l'articlo participio en aragonésveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Ta más detalles, veyer l'articlo participio fuerte en aragonésveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Os participios de fuyir y muyir son fuertes en belsetán (fuito, muito), encara que en atras variants d'aragonés pueden estar regulars (fuyito/fuyiu y muyito/muyiu).

O verbo freyir/friyir presenta un participio fuerte frito y atro de feble, friyiu.

O verbo oyir presenta un participio regular en uyiu en ansotán y atro irregular por a radiz pero no a desinencia udito en panticuto y aragonés de valle de Vio,[8] feito a partir d'un odir que existió en romanz navarro y en aragonés medieval y que huei persiste en ansotán como odir con r muda.

En o verbo esleyir tenemos o participio irregular fuerte esleito, que ye común en textos aragoneses y navarros medievals, y seguntes Francisco Ynduráin ye un semicultismo.[10] Por atra part tamien en os textos medievals aragoneses y navarros tardanos tamién trobamos as formas eslido u esleido, regularizatas. Eslito se documenta en as Cronicas d'os Chudeces de Teruel, escrito en aragonés d'as comunidatz aragonesas, y encara en textos escritos en castellán d'Aragón d'o S XVI y Sieglo XVII como os "Anales de la Corona de Aragón" y a obra de Mohamad Rabadán[11].

Beluns d'esta clase de participios irregulars fuertes se relacionan con l'aragonés fito, fita, (fosilización d'o participio latín FICTUS d'o verbo FIGERE), y con os participios de verbos medievals aflichir y esconfir que acaban en -ito aflito y esconfito, que derivan de participios latins AFLICTUM y SCONFICTUM con o grupo -KT- en os quals a -i- d'a radiz ha absorbito a semivocal d'a evolución romanz -it- d'este grupo.

Confusión con os verbos que acaban en -uir[editar | editar código]

En aragonés trobamos bell verbo acabau en -uir como construir, estatuir, destruir, influir, restituir, que en latín acababan en -UERE y que son cultismos u semicultismos. En beluns ye documentada una conchugación incoativa en aragonés medieval. Esta clase de verbos comparten con os verbos esleyir y freyir a existencia de participios fuertes como destruito, que documentamos en aragonés medieval.

En aragonés escrito actual bi ha tendencia a escribir os verbos con -y- en formas impersonals (destruyir, destruyito), que teoricament han puesto existir como existen en asturián normativo, en catalán antigo, en chodigo-espanyol y en castellán dialectal, especialment en variants americanas. A tendencia a escribir as formas en -uyir y -uyito en aragonés común de zaguers d'o sieglo XX s'ha cheneralizau tamién con os sustantivos que en derivan (influyencia, confluyencia, afluyencia). Manimenos quasi no bi ha documentación medieval d'ixos infinitivos (que s'escriben en os textos acabaus en -uir, -uhir u -uyr, rarament en -ovir: destruir/ destruhir, destruyr/destrovir), ni estudios actuals sobre o presunto uso en parlas altoaragonesas actuals. A sola documentación medieval de formas como destroyidos u destruyidos se reduce a lo manuscrito d'un borrador conservau que facioron escribans catalanoparlants antes d'a redacción definitiva de "La Grant Cronica d'Espanya de Chuan Ferrández d'Heredia.[5]

Referencias[editar | editar código]

  1. (fr) Jacqueline Picoche, Jean-Claude Rolland: Dictionnaire étymologique du français. Dictionnaires Le Robert, 2009. ISBN 2849024244, 9782849024249
  2. Dawn E. Prince El aragonés literario a finales del S XIV El testimonio del Libro del Trasoro. Edición y traducción a cargo de Francho Rodés. EDACAR, septiembre de 2007 [1]
  3. Antonio Pérez Martínez Los Fueros de Aragón: la Compilación de Huesca. Edición crítica de sus versiones romances. El Justicia de Aragón.
  4. (es) José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico, 2003. p 353
  5. 5,0 5,1 Regina af Geijerstam. Un esbozo de la Grant Crónica de Espanya de Juan Fernández de Heredia. Archivo de Filología Aragonesa, 52-53, 1996-1997 [2]
  6. 6,0 6,1 Tomás Buesa Oliver: Soluciones antihiáticas en el altoaragonés de Ayerbe. A.F.A X-XI 1958-1959 [3].
  7. 7,0 7,1 Manuel Alvar El habla del Campo de Jaca Universidad de Salamanca, 1997 [4]
  8. 8,0 8,1 8,2 Francho Nagore et al. Endize de bocables de l'aragonés. Instituto de Estudios Altoaragoneses, Uesca 1999.
  9. Francho Rodés, Paquita Maza, Gonzalo Gavín Bocabulario monegrino. Publicacions d'o Consello d'a fabla aragonesa, 2005.
  10. Francisco Ynduráin Documentos de la iglesia de Santa María de Sangüesa (siglos XIV y XV). Estudio lingüístico. Pirineos año IV - 1948 [5]
  11. José Antonio Lasarte López Poemas de Mohamad Rabadan Diputación General de Aragón, 1991 pp 332

Bibliografía[editar | editar código]


Gramatica de l'aragonés
Fonetica Accentuación · Apocopa · Oclusivas xordas intervocalicas · Cheada · Diftongación debant de Yod · Diftongos · Disimilación · Elisión · Epentesi antihiatica · Esdrúixols · Eufonía · Fonolochía · Hiatos · Metafonia · Metatesi · Protesi velar · Sincopa · Sonorización dezaga de liquida ·
Morfolochía Adverbios (Adverbios d'afirmación · Adverbios de dubda · Adverbios espacials · Adverbios espacials deicticos · Adverbios de negación · Adverbios de tiempo · Adverbios de manera · Adverbios de quantidat · Adverbios d'opinión) · Locucions adverbials en aragonés (Locucions adverbials d'afirmación · Locucions adverbials de dubda · Locucions adverbials espacials · Locucions adverbials de negación · Locucions adverbials temporals · Locucions adverbials de manera · Locucions adverbials quantitativas) · Articlos definius · Articlos indefinius · Chenero · Conchuncions (Adversativas · Copulativas · Coordinativas · Dischuntivas · Completivas · Condicionals · Causals · Concesivas · Consecutivas · Comparativas · Finals · Subordinativas · Temporals)· Adchectivos (Qualificativos · Colors · Chentilicios · Grau comparativo · Grau superlativo · Demostrativos · Exclamativos · Indefinius · Numerals cardinals · Interrogativos · Numerals ordinals · Posesivos) · Numero (Substantivos incontables) · Pronombres (Pronombres demostrativos, Pronombres indefinius, Pronombres relativos · Pronombres presonals · Pronombres adverbials: pronombre adverbial en/ne, pronombre adverbial i/bi/ie) · Infixo · Prefixo (Prefixos cultos) · Sufixo (Sufixos cultos) · Preposicions · Locucions prepositivas · Verbos (Verbos auxiliars · Verbos de movimiento · Verbos pronominals · Verbos freqüentativos) · Conchugación verbal (Primera conchugación · Segunda conchugación en aragonés · Tercera conchugación en aragonés · Conchugacions incoativas · Conchugación incoativa de verbos acabaus en -eixer · Conchugación incoativa de verbos acabaus en -ir · Verbos irregulars · Modo indicativo · Modo subchuntivo · Modo imperativo · Tiempos verbals · Verbo estar-ser · Verbo haber) · Locucions verbals · Perifrasis verbals
Sintaxi Concordancia · Estilo directo · Estilo indirecto · Negación · Sintagma adchectival · Sintagma nominal · Sintagma verbal · Complemento de rechimen verbal · Orden de pronombres · Combinacions de pronombres febles en aragonés · Voz pasiva · Oracions con infinitivo · Oracions de relativo · Oracions completivas · Oracions temporals · Oracions causals · Oracions finals · Oracions consecutivas · Oracions concesivas · Oracions condicionals · Oracions comparativas · Oracions impersonals
Lexicolochía Adchectivación · Anglicismos · Arabismos · Castellanismos · Catalanismos · Celtismos · Chermanismos · Cultismos · Fitonimia · Galicismos · Goticismos · Helenismos · Italianismos · Leyonesismos · Lusismos · Miconimia · Mozarabismos · Neerlandismos · Nominalización · Occitanismos · Persismos · Semicultismos · Superstrato francico · Toponimia (Hidronimia · Odonimia · Oiconimia · Oronimia) · Tudesquismos · Turquismos · Vasquismos · Zoonimia
Ortografía Ortografía medieval · ACAR · Uesca · SLA