Valldigna

De Biquipedia
Ir a la navegación Ir a la búsqueda
La Valldigna respecto de la Safor

La Valldigna ye una val y comarca historica de lo País Valencián huei adhibita administrativament en la comarca de la Safor. Los lugars de la val suman 24.462 habitants (INE 2006). Huei bi ha una mancomunidat con lo mesmo nombre, la Mancomunidat de la Valldigna, y en forman parte los municipios de Barx, Benifairó, Simat y Tavernes, que tracta temas que afectan a la Valldigna. La capital tradicional de la comarca ye Tavernes de la Valldigna, que con 17.988 habitants (INE 2006) ye lo municipio més grant de la val, encara que la capital de la mancomunidat ye Benifairó.

Toponimia[editar | editar código]

En tiempos de los musulmans se diciba Alfándec, que significa terreno paulenco, car en ixos tiempos los almarchals de Xeresa-Xeraco yeran més extendillatos, ocupando buena part de la val.

Seguntes una leyenda la val prenió nombre de digna dimpués d'una conversa entre Chaime II y l'abate de lo Monesterio de Santes Creus. Enantes de lo 15 de marzo de 1298, calendata de la fundación de lo monesterio y mientres la reconquiesta de lo Reino de Murcia, lo rei Don Chaime II transitaba por la Vall d'Alfàndec de Marinyen y se chiró enta l'abate y li dició "Quina vall més digna per a un monestir de la vostra religió", y l'abate li respondió: "Vall digna senyor, vall digna".

La comarca, u parzana en l'actualidat, amaneix en lo mapa d'Emili Beüt "Comarques naturals del Regne de València" publicato en 1934. En feban part los municipios actuals de Barx, Benifairó de la Valldigna, Simat de la Valldigna, Tavernes de la Valldigna, Xeraco y Xeresa.