Truesa
Una truesa[1][nota 1] u troseta[1] ye una branca verde d'una planta (árbols u arbustos) de fuella ampla y que se talla a esprés pa dar-le-ne a os animals domesticos a modo de pastura como complemento d'alimentación[2] de a hierba u pa cuan no se los puede soltar (por eixemplo, cuan i hai nieu afuera).
A las brancas destinadas a troseta, de tallar-las con a estraleta se diz «trosar-las», con que «se trosan»[3] pa os animals. Tamién se puet decir «fer trosetas».[2]
En l'Alto Aragón se trosaba as ramas d'árbols especificos, pos no todas as especies tienen as caracteristicas nutritivas que precisan os animals u pueden fer-les mal prebo, como as que les fan rinflar-se. Por ixo s'ha de parar cuenta. Especies que se podeba fer trosetas son: o caixigo, l'abellanera, o laitonero y o fraixín, y tamién cualques frutals domesticos como as manzaneras, pereras, cereseras, etc. S'ha d'evitar especies con sustancias toxicas u de mal gusto, como a figuera u o baladre. Tamién existe animals que les fa goyo as trosetas d'árbols que os de demás no tocan, como as crabas con os pins.
Notas
[editar | modificar o codigo]- ↑ Con a variant trosa
Referencias
[editar | modificar o codigo]- ↑ 1,0 1,1 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ 2,0 2,1 BLAS GABARDA, Fernando y ROMANOS HERNANDO, Fernando, El Aragonés de Baixo Peñas; Institución «Fernando el Católico» + Gara d'Edizions, 2005. ISBN 84-8094-054-9
- ↑ CASTILLO SEAS, Fabián. Bocabulario de l'aragonés d'Alquezra y lugars d'a Redolada. Consello d'a Fabla aragonesa, 2001. ISBN 84-86036-94-1