Cinclus cinclus

Cinclus cinclus
Torda auguadera (Cinclus cinclus)
Denominacions populars
torda auguadera / torda aguadera, aguadera, torda nadadera, torda d'augua, torda d'aigua, torlla d'aigua, anadeta, papiblanca, pescadera
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Cinclidae
Chenero:	Cinclus
Especie:	C. cinclus
Descripción
Cinclus cinclus LINNAEUS, 1758
Distribución cheografica
Distribución.

A torda auguadera u torda nadadera (nombre cientifico Cinclus cinclus (L., 1758)), tamién dita torda d'augua, ye una au paseriforme d'a familia Cinclidae, propia de torrents, ríos y barrancos d'augua limpia en Europa y Asia. Tamién se conoixe como anadeta, papiblanca u pescadera.

Descripción

A torda auguadera no ye una verdadera torda; a penar d'ixe nombre no ye sisquiera un miembro d'a familia Turdidae, y fa parte d'a familia Cinclidae por contra. Se tracta d'una paseriforme (paixaro) d'entre 17 y 18 centimetros de largaria y entre 50 y 70 gramos de peso, con o pico recto y apuntau ta debant y as zarpas con tres didos rectos, firmes, ta debant y uno a la contra, recto, ta dezaga, y una postura y forma corporals que fan recordar vagament a las tordas d'o chenero Turdus.

Tiene o cuerpo robusto, arrochau, con a cabeza graniza y as alas y a coda prou curtas. A coda tiene forma cuadrada y a debanta por alto d'o cuerpo con frecuencia (cosa rara entre as tordas d'o chenero Turdus, en comparanza). As patas son recias, fuertes y prou grans. O pico ye de color negra, recto y punchudo.

As colors son marrón lasa por alto, que va tornando-se cada vegada mas negra pizarra a mesura que s'amana ta a coda de l'animal, y una gran malla blanca que va dende a barbeta dica lo peito por tot lo papo de l'animal. Puet tener una faixa royisca en o peito, que desepara la taca blanca contra la tripa negra d'o paixaro.

Habitat

L'auguadera ye un paixaro extremadament dependient de l'augua. Vive siempre arredol d'os ríos y torrents d'auguas vivas y bien oxichenadas, a on que troba lo suyo alimento, y fa niedo en as riberas, ya sía en foratos entre as penyas, ya sía en puents, azuz y atras construccions humanas.

De regular, s'asocia con os corsos d'augua de montanya porque son a on que l'augua ye mas viva y limpia. Manimenos, en o departamento francés d'os Pireneus Orientals y en a isla de Corcega s'ha documentau que nidifican a poca altaria sobre o livel d'a mar, 200 msnm en os Pireneus y 100 m en a isla mediterrania, siempre que as condicions les ne permitan. Cuan o medio ye favorable encara pueden vivir en planas y en estanyos.

Alimentación

L'auguadera ye una au insectivora, que consume una gran cantidat d'insectos acuaticos y as suyas ninfas, como cucas de remo y teixidors, escarabachos d'augua y as suyas larvas, moluscos como caragols d'augua y mesmo bel peix chicorrón si el puet pillar. Tamién pesca cabezudos de ranas y zapos, y crías de cullebras que plegan de naixer.

Comportamiento

Torda auguadera cantando.

A torda auguadera ye una au acuatica, condición ni mica común entre as Passeriformes. Tiene o plumache totalment impermeable, y lo emplega pa capuzar-se en l'augua y bate as alas pa propulsar-se. Tamién puede dentrar en l'augua caminando lindingo-lindango y va submerchendo-se miqueta a miqueta.

Captura lo suyo alimento tanto debaixo de l'augua como difuera: pilla insectos en volido, ranca moluscos d'as penyas, etc. Ye un animal muit territorial y no tolerará que garra atro miembro d'a suya especie invada lo suyo territorio, que sole comprender entre 1 y 1,2 km de ribera d'un troz de río.

Ye una au resident en a mayoría d'a suya aria de distribucción mundial. Nomás en bels países d'o norte d'Europa (Suecia, Finlandia y as Republicas balticas) i ha poblacions a on que os eixemplars emprendan una curta migración en l'hibierno, dende as zonas de montanya cara ta as planas, pa mirar d'evitar-se la chelada de l'augua.

Imáchens

• 
• 
• 
• 
• 
  Cinclus cinclus

Vinclos externos

• Se veigan as imáchens de Commons sobre Cinclus cinclus.
• Wikispecies tiene un articlo sobre Cinclus cinclus.

• Datos: Q201831
• Multimedia: Cinclus cinclus / Q201831
• Especies: Cinclus cinclus