The American President

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
The American President
Títol The American President
Póster d'a cinta.
Póster d'a cinta.
Ficha tecnica
Dirección Rob Reiner
Producción Rob Reiner
Disenyo de producción Lilly Kilvert
Guión orichinal Aaron Sorkin
Musica Marc Shaiman
Fotografía John Seale
Montache Robert Leighton
Escenografía Karen O'Hara
Vestuario Gloria Gresham
Maquillache Daniel C. Striepeke
Peluquería Kathryn Blondell
Actors Michael Douglas
Annette Bening
Martin Sheen
David Paymer
Samantha Mathis
Michael J. Fox
John Mahoney
Anna Deavere Smith
Color Technicolor
Datos y cifras
País(es) Estaus Unius
Anyo 1995
Debantadera 8 de noviembre de 1995
Nueva York (Estaus Unius)
Chenero(s) Cine de comedia
Cine de drama
Cine de romance
Durada 113 min.
Idioma(s) Anglés
Companyías
Productora(s) Columbia Pictures
Castle Rock Entertainment
Wildwood Enterprises
Distribución Universal Pictures
Estudio(s) Castle Rock Entertainment
Presupuesto 62 millons de dólars
Recauto 107,9 millons de dólars
Informacions en bases de datos especializadas:

The American President (títol orichinal en anglés, en aragonés O president americano, enguerada en Aragón con o títol en castellano de El presidente y Miss Wade, O president y Miss Wade en aragonés) ye una cinta de comedia dramatico-romantica de cine estausunidense de l'anyo 1995 dirichida por Rob Reiner seguntes un guión orichinal d'Aaron Sorkin, con una dirección de fotografía de John Seale y una Banda Sonora Orichinal de Marc Shaiman. Producida por o mesmo Rob Reiner ta las productoras Columbia Pictures, Castle Rock Entertainment y Wildwood Enterprises, en l'elenco d'a cinta bi ha actors como Michael Douglas, Annette Bening, Martin Sheen, David Paymer, Samantha Mathis, Michael J. Fox, John Mahoney y Anna Deavere Smithentre d'atros.

A cinta s'ambienta en Washington, DC en os anyos 1990 y se rodó en a mesma ciudat de Washington y en Culver City (California). The American President estió un exito de publico, con un recaudo de 107,9 millons de dólars, con un presupuesto de nomás que 62 millons. Tamién l'aculló bien favorablement a critica especializada, en destacando los parabiens ta los protagonistas masculín (Michael Douglas) y femenín (Annette Bening) d'a cinta, ta la suya banda sonora (Marc Shaiman) y ta lo suyo guión (Aaron Sorkin). Tamién recibió cuantos premios y nominacions, en destacando una nominación a lo Premio Oscar (Banda Sonora Orichinal de Musical u Comedia, Marc Shaiman) y cinco nominacions a los Premios Globos d'Oro (Millor Director, Rob Reiner; Millor Guión, Aaron Sorkin; Millor Actor de Musical u Comedia, Michael Douglas; Millor Actriz de Musical u Comedia, Annette Bening; y Millor Cinta de Musical u Comedia). Antiparte, l'American Film Institute colocó a The American President en a 75ena posición en a suya lista AFI 100 anyos...100 pasions.

Argumento[editar | modificar o codigo]

Andrew Shepherd ye actualment o president d'os Estaus Unius por o Democratic Party, con a-saber-la popularidat por a suya chestión presidencial, y ye preparando-se ta presentar-se a la reelección como president. O president y lo suyo chefe de Gabinet, AJ MacInerney, qui ye a mas lo suyo millor amigo personal, preban de consolidar l'index de popularidat presidencial (que ye d'un 63%) en fendo aprobar un prochecto de lei de control d'o crimen, encara que lo prochecto ye controvertiu porque d'una man os liberals lo condideran poco agosarau y, d'atra man, os conservadors lo consideran masiau abanzau. Tanimientres, d'aprovar-se lo suyo prochecto se podría considerar que Shepherd ya cuasi que tiene garantizada la suya reelección. Finalment, o president decide anunciar o suyo nuevo prochecto de lei mientres o discurso de l'estau d'a Unión.

O president Shepherd ye viduo y qui gosa acompanyar-lo como parella en os actos oficials ye su prima Judith, pero en ixe momento ye malauta y como consecuencia no puet acompanyar-lo en una cena d'estau con o president de Francia y su muller, que son de visita oficial en os Estaus Unius, y Shepherd para cuenta de que, como li diz una d'as suyas asesoras, ye un viduo solitario. Casualment l'advogada Sydney Ellen Wade, a qui acaba de contractar un lobby que fa campanya por a protección d'o medio ambient, plega en a Casa Blanca te tener una reunión con un miembro d'o Gabinet d'os Estaus Unius ta conseguir una reducción d'un 20% d'as emisions de dioxido de carbonio y Shepherd la conoix y se siente atrayiu por ella. En una reunión privada, lo president plega a un alcuerdo con Wade: si ella puet conseguir 24 votos favorables ta un prochecto de lei sobre o medio ambient antes de l'amanau discurso de l'estau d'a Unión, él li garantizará os atros 10 votos necesarios ta la suya aprobación. Lo chefe d'o Gabinet presidencial, MacInerney, considera que ye un buen alcuerdo porque si se consigue aprovar o prochecto será en beneficio d'a candidatura presidencial y si no se consigue, lo president quedará libre de garra culpa en no estar-ne lo responsable; y de feito MacInerney creye que s'escayecerá ista segunda posibilidat.

Poquet a poquet, o president y miss Wade s'enamoran. O miembro d'o Senau d'os Estaus Unius Bob Rumson, qui tamién aspira a la presidencia d'o país, descubre que puet aproveitar o pasau como activista de Wade ta criticar indirectament a Shepherd fendo-ne enfasi en a suya defensa d'os valors familiars front a la suposada falta d'etica de Shepherd y d'a suya novia, y mesmo fa insinuacions de que s'ha prostituyiu a cambio de favors politicos. Como lo president insiste en no refutar as suyas afirmacions, cada vegada mas creixidas, l'index de popularidat de Shepherd se reduz de mica en mica y finalment fa periglar l'aprovación d'o suyo prochecto de ley contra lo crimen.

Un día, mientres una fiesta oficial en a Casa Blanca, Wade diz a su novio lo president y a MacInerney que ye escachifurriada dimpués d'una reunión que ha teniu con tres miembros por l'estau de Michigan d'o Congreso d'os Estaus Unius ta prebar de convencer-los de refirmar lo suyo prochecto de protección ambiental y menciona inadvertidament que ixos congresistas nomás quieren que redotar os dos prochectos, o presidencial de luita contra lo crimen y l'ambiental que esfensa Wade, pero que encara quieren eliminar con mas carena o prochecto de Wade. Shepherd y MacInerney paran cuenta de que acaban de recibir una información vital ta recibir tres votos mas ta l'aprobación d'o suyo prochecto encara que ixo significará incumplir lo suyo alcuerdo con Wade y encara que emplegar ixa información obtenida no li parixe masiau etico a lo president.

Finalment, Wade consigue complegar os suficients votos ta l'aprovación d'o suyo prochecto medioambiental pero a Andrew Shepherd li calen encara tres votos t'asegurar l'aprovación d'o suyo prochecto de lei contra lo crimen. Nomás puet conseguir lo suyo obchectivo que en fendo un tracto con os tres congresistas de Michigan ta que voten lo suyo prochecto a cambio de que la presidencia no refirme lo prochecto mediaombiental. Y Shepherd decide acceptar ixe alcuerdo. alavez, o lobby d'esfensa d'o medio ambient que heba contractau a Wade li dona palleta en considerar que no ha cumpliu los obchectius ta los que la heban contractau y Wade se troba con o president ta decir-le que ha crebau la suya relación y que ella marcha enta Hartford, en Connecticut, a on ha trobau un treballo en una campanya local en haber perdiu todo lo suyo prestichio politico. Shepherd li esfiende lo suyo propio prochecto de luita contra lo crimen pero alavez Wade li critica ixe prochecto en estar masiau blando y con bien pocas posibilildaz de reducir la cifra de crímens.

Antis de pronunciar o suyo discurso de l'estau d'a Unión, o president decide fer una compareixencia por sorpresa en a sala de prensa d'a Casa Blanca a on finalment li planta cara a lo senador Bob Rumson y mas anuncia que retira lo suyo prochecto de luita contra lo crimen ta fer-lo mas contundent en l'esdevenidero en establindo mesuras de control d'armas y que a mas aparca de momento ixe prochecto ta concentar-se en l'aprovación d'un prochecto de protección d'o medio ambient en a linia d'as sucherencias de Wade, con una reducción d'un 20% en as emisions de dioxido de carbonio. O personal d'a suya secretaría y mesmo la prensa amuestran o suyo entusiasmo, pero encara cal saber si tot ixo bastará ta que Wade reconsidere la suya decisión de rematar con a relación sentimental con o president.

Elenco[1][editar | modificar o codigo]

Actor Papel Notas
Michael Douglas President Andrew Shepherd
Annette Bening Sydney Ellen Wade
Martin Sheen Chefe d'o Gabinet A.J. MacInerney
Michael J. Fox Asistent d'o president Lewis Rothschild
Anna Deavere Smith Secretaria de prensa d'a Casa Blanca Robin McCall
Samantha Mathis Asistent d'o president Janie Basdin
Shawna Waldron Lucy Shepherd, filla d'o president
David Paymer Subchefe d'o Gabinet Leon Kodak
Anne Haney Secretaria d'o president Mrs. Chapil
Richard Dreyfuss Senador Bob Rumson
Nina Siemaszko Beth Wade, chirmana de Sydney
Wendie Malick Susan Sloan
Beau Billingslea Achent Cooper
Gail Strickland Esther MacInerney
Joshua Malina David
Clement von Franckenstein President D'Astier
Efrat Lavie Madame D'Astier
John Mahoney Leo Solomon
Taylor Nichols Stu
John Mahon President de l'Estau Mayor Conchunto d'os Estaus Unius
Tom Dahlgren Secretario d'Esfensa
Ralph Meyering Jr. Cheneral
Kurt Boesen Asesor de Seguridat
Joseph Latimore Achent d'o Servicio Secreto
Darryl Alan Reed Achent d'o Servicio Secreto
Andrew Steel Achent d'o Servicio Secreto
Jordan Lund Carl
Richard McGonagle Asesor de Rumson
Richard Stahl Asesor de Rumson
Frank Cavestani Asesor de Rumson
Alice Kushida Carol
Renee Faia Lisa
Beans Morocco Portero
Kathryn Ish Secretaria d'Educación
Kamilah Martin Mesacha d'a floristería
Augie Blunt Chardinero
Thom Barry Guarda
Steve Gonzales Secretario de Hud
Gabriel Jarret Jeff
Karen Maruyama Secretaria de Leo
Nancy Kandal Leslie
George Murdock Miembro d'o Congreso d'os Estaus Unius
Bernie McInerney Miembro d'o Congreso d'os Estaus Unius Millman
Jack Gilroy Miembro d'o Congreso d'os Estaus Unius Pennybaker
Matthew Saks Personal d'o Congreso
Googy Gress Gil
Ron Canada Periodista Lloyd
Brian Coffee Periodista
Rick Garcia Periodista
Aaron Sorkin Aduyant en o bar
Kymberly Newberry Sally
Greg Poland Mark
Leslie Bega Laura, personal d'a Casa Blanca
Jennifer Crystal Foley Maria, personal d'a Casa Blanca
Arthur Senzy Delegau
Nick Toth Aduyant d'a Casa Blanca
Jorge Noa Aduyant d'a Casa Blanca
Maud Winchester Aduyant d'a Casa Blanca
Jeffrey Anderson Presentador de televisión
Suzanne Michaels Presentadora de televisión
Mark Thompson Kenneth Michaels
David Drew Gallagher Mesache nuevo
Todd Odom Achent d'o Servicio Secreto
Michael G. Alexander Oficial d'a Guardia d'Honor
Anthony Backman Senador por Arizona No acreditau
Rose Barrett Periodista No acreditau
Faith Burton Periodista No acreditau
Jan Citron Miembro d'o lobby No acreditau
Arthur Eckdahl Comentarista de televisión No acreditau
Roger Ferreira Congresista No acreditau
Jill Gable Miembro d'o lobby No acreditau
Star Halm Convidau a la cena en a Casa Blanca No acreditau
Adolphus Hankins Convidau a la cena en a Casa Blanca No acreditau
Betty Hankins Convidada a la cena en a Casa Blanca No acreditada
James Lasley Periodista No acreditau
Suzanne Lodge Convidada a la cena en a Casa Blanca No acreditada
Gorja Max Asistent politico No acreditau
Mark Norris Periodista No acreditau
Sherry O'Keefe Convidau a la cena en a Casa Blanca No acreditau
Michael Satterfield Asistent a la gala No acreditau
Roger Steffens Locutor radiofonico No acreditau
Helen Thomas Ella mesma No acreditada
Ray Uhler Senador No acreditau
Michael Wajacs Convidau a la cena en a Casa Blanca No acreditau
Mark Watson Achent d'o Servicio Secreto No acreditau

Producción[editar | modificar o codigo]

L'actor Robert Redford se dirichió a cuantos guionistas con una sola frase ("the president elopes"; "o president s'esfuga") ta que fesen un primer esborrallo, esleindo a Aaron Sorkin en cuacar-li lo suyo tractamiento d'ixa idea ta que desembolicase un primer guión con Redford como proragonista masculino d'a cinta, ufrindo-le lo papel protagonista femenino a Emma Thompson, qui lo refusó. Y cuan Rob Reiner s'incorporó en l'equipo como futuro director, Redford l'albandonó. Yera octubre de 1994 y ya yera todo preparau ta escomencipiar o rodache o siguient 30 de noviembre y lo publicista de Redford afirmó que Redford quereba "fer una historia d'amor, pero (Reiner) quereba fer bella cosa que en zagueras tractase de politica". Tanimientres, d'atras fuenz sucheriban que Redford y Reiner "no teneben buena relación... Yera una cuestión de personalidat".[2] En una entrevista posterior, o guionista Aaron Sorkin dició a TV Guide que heba escrito lo guión en estando drogau con crack en as suyas habitacions en l'Hotel Four Seasons en Los Angeles y que por ixo heba trigau tres anyadas (sic) en a suya redacción.[3]

Ta la filmación d'a cinta, se construyó un gran set de rodache en simulando estar a Casa Blanca, mesmo l'ala este que l'ala ueste, en os estudios d'a productora Castle Rock Entertainment en Culver City (California); o despacho oval presidencial se fació servir posteriorment ta las cintas Nixon (1995, Oliver Stone) y Independence Day (1996, Roland Emmerich).[4]

Demanda por l'autoría d'o guión[editar | modificar o codigo]

William Richert demandó debant d'o Writers Guild of America en no amanixer en os títols de credito d'o guión d'a cinta, en afirmar que lo guión de Sorkin yera un plachio poco disimulau d'o suyo guión de l'anyo 1981 The President Elopes.[5] Tanimientres, dimpués de l'arbitrache d'o Guild, Sorkin recibió toda la titularidat d'os creditos en The American President. Seguntes Richert, tamién a serie de televisión The West Wing s'inspiraba parcialment en o suyo guión.[6]

Enguero[editar | modificar o codigo]

The American President s'engueró lo 8 de noviembre de 1995 en a ciudat de Nueva York con un recaudo total de 60,1 millons de dólars en Estaus Unius y atros 47,8 millons en atros países, con una suma total de 107,9 millons. En o suyo primer cabo de semana d'enguero recaudó 10 millons (tercera posición en a taquilla), en o segundo 9,7 millons y en o tercero atros 5,3 millons, estando lo seiseno por a cifra de recaudo en istas dos zagueras.

Critica[editar | modificar o codigo]

En Rotten Tomatoes, a cinta tien un index d'aprobación d'o 91% seguntes 55 resenyas, con una calificación promeyo de 7/10. O consenso critico d'a web diz: "Una escantadora comedia romantica con un sinyalín de politica, The American President de Rob Reiner presenta solidas actuacions principals y bellas observacions conmovedoras d'a politica y los medios en la decada de 1990".[7] En Metacritic a cinta tien una puntuación meya ponderada de 67 sobre 100, basada en 21 criticos, i ixo indica "criticas cheneralment favorables". O público enquestau por CinemaScore li dio a la cinta una calificación promeyo de "A" en una escala de A+ a F.[8] Recibió elogios y "Two Thumbs Up" (dos didos grans entalto) en o programa televisivo At the Movies de Gene Siskel y Roger Ebert, que se sorprendioron d'o buena que yera la cinta en considerando que l'anterior cinta de Rob Reiner, North (1984) heba estau la suya selección ta la pior cinta de l'anyo. Ebert dició que dimpués d'espernir North yera muit feliz y complaciu de dar-li a la siguient cinta de Reiner una critica unanimement positiva. Siskel elochió a Douglas y Bening por as suyas actuacions.

José María Aresté, en Aceprensa, diz que:[9]

Cal chuzgar a cinta como una fantasía romantica con rivez politicos si no queremos veyer-la muel u dulzona. Pero ixo no ye obstaclo ta que Reiner y Sorkin aproveiten a historia con l'obchecto de vender bellas ideas; ixo sí, suaument (...) O director fa una escenografía muit clasica y eficaz, que ampra elementos d'o cine de Frank Capra, a qui se cita explicitament (...) Michael J. Fox ... chunto con os atros miembros d'un brillant elenco, contribui en gran mesura a l'encanto que despren a cinta.

Eulàlia Iglesias en SensaCine comenta:[10]

Ixo que en o suyo momento se percibió como una comedia romantica dirichida por o responsable de "When Harry Met Sally" que actualizaba l'esprito de bello cine de Frank Capra agora se desvela millor como l'ensayo cheneral feito por Aaron Sorkin, qui astí fa de guionista, ta una d'as series mas influyents d'a televisión contemporania. Ye cuasi como si estasemos debant d'un episodio piloto de "The West Wing"

Influyencias[editar | modificar o codigo]

Influyencia en The West Wing[editar | modificar o codigo]

O guión d'a cinta inspiró muitos aspectos d'o treballo posterior de Sorkin, una serie de televisión dramatica clamada The West Wing (enguerada en Aragón como El ala oeste de la Casa Blanca). As dos produccions presentan a lo personal d'una Casa Blanca muit idealizada y, como muitos d'os prochectos de Sorkin, en comparten la ideolochía. La influyencia d'a cinta se puet veyer mas clarament en os primers episodios d'a serie; bellos dialogos en toz dos son cuasi identicos. Se conoix que Sorkin deció que gran parte d'a primera temporada en realidat s'heba pillau d'o material que editó d'o primer esborrallo d'o guión de The American President.

Un d'os temas tractaus en a cinta y desembolicau en a serie se relaciona con os prochectos de lei de control d'armas, desembolicaus en l'episidio d'a serie Five Votes Down, o cuatreno d'a primera temporada. Encara que lo prochecto de lei finalment lo retira lo president Shepherd en considerar-lo ineficaz, en a serie lo president Bartlet y lo suyo personal treballan arduament ta conseguir aprobar lo suyo proyecto de lei encara que tien greus fallos (y rematan estando doblement despagaus cuan o vicepresident John Hoynes, con qui lo presidente y lo suyo personal directivo son barallando-se, gana lo prochecto de lei ta éls en persuadir a un influyent democrata sudenco ta que lo refirme).

Mas significativo ye lo tema d'una "respuesta proporcional" a los ataques militars contra obchectivos estausunidenses en l'estranchero. En The American President, Andrew Shepherd se troba en a sala de crisis d'a Casa Blanca tenendo que ordenar un ataque de iste tipo contra lo cuartel cheneral d'a intelichencia de Libia dimpués de que los libios bombardiasen un sistema de defensa antimisils llamado "C-STAD" (Defensa Tierra-Aire de Capricornio) que s'habría instalau por os Estados Unidos en territorio d'Israel. Reflexiona en una sola linia "Bel día, caldrá que bellun m'explique la virtut d'una respuesta proporcional", antes de dar la orden. En l'episodio d'a serie A Proportional Response (tercer episodio d'a primera temporada), o president Bartletse se troba en una situación similars (la intelichencia siria derriba un avión estausunidense en Chordania en matando a muitos ciudadans estausunidenses, incluyindo-ie un choven oficial naval que lo president heba decidiu que estase lo suyo medico personal) y, sentau en a sala de crisis d'a Casa Blanca con o suyo propio Consello de Seguridat Nacional pregunta: "Cuala ye la virtut d'una respuesta proporcional?" En toz dos casos, o president eslíe una respuesta militar relativament mesurada, pero en a cinta lo president Shepherd mai no considera una respuesta "desproporcionada", demientres o president Bartlet planeya una acción d'ixe tipo ta destruyir un gran aeropuerto civil en Siria; eventualment da luz verde ta un ataque pareixiu a lo que se amuestra en a cinta.

O lobby clamau Global Defense Council, u lobby ficticio que contracta a Sydney Wade, tamién ye present en a serie The West Wing en o episodio The Drop-In d'a ssuya segunda temporada y amás tamién en ye present en d'atros episodios, mencionau circunstancialment.

En The American President, lo lobby finalment desfirma a Sydney Ellen Wade porque lo president ha negociau un alcuerdo que fa que la suya esforzada lechislativa fracase. D'una manera similar, en l'episodio final d'a tercera temporada de The West Wing, o subchefe de personal Josh Lyman fa servir a mesma tactica y remata por fer fuera a Amy Gardner d'o suyo cargo en a Conferencia de Liderato de Mullers. Josh y Amy son festechando cuan s'escayece ixo, chustament mesmo que los personaches principals d'a cinta. Tanimientres, en a serie de televisión ye Amy qui preba d'esboldregar un prochecto de lei (reforma de l'asistencia social) y Josh se niega a acceptar as demandas de tres congresistas republicans porque creye que son equivalents a un chantache.

En The American President s'inclui a mención d'un gubernador Stackhouse, y tamién bi ha un senador por Minnesota clamau Howard Stackhouse (George Coe) en os dos episodios de The West Wing clamaus The Stackhouse Filibuster (segunda temporada) y The Red Mass (cuatrena temporada). Igualment, o president francés que ye present en a una cena d'estau en The American President parixe estar o mesmo president d'Astier a qui a sobén se fa referencia en The West Wing.

Antiparte, cuantos actors de The American President amanixen en The West Wing, incluyido-ie a Martin Sheen (lo personache d'o cual en The American President, AJ, ye acusau en una escena por Shepherd de no tener a rasmia cua s'amenista ta postular-se ta lo cargo) como lo president Josiah Bartlet, Anna Deavere Smith como l'asesora de Seguridat Nacional Dra. Nancy McNally, Joshua Malina como director de Comunicacions d'a Casa Blanca Will Bailey, Nina Siemaszko como Ellie Bartlet, Ron Canada como subsecretario d'Estau Theodore Barrow y Thom Barry como lo congresista Mark Richardson.

As caracterizacions d'o president como una persona idealista pero indecisa tamién son pareixidas. En The American President, Shepherd ha d'estar convenciu por o suyo personal ta concarar-se con o suyo oponent republicano y perseguir con decisión o control d'armas y la lechislación ambiental. En The West Wing, de vegadas se fa referencia a Bartlet como "Tío Fluffy" ("tío escatarizau") cuan refirma puntos de vista moderaus que son mas conciliadors y menos agosaraus (por eixemplo, en os episodios "Let Bartlet Be Bartlet" y "The Two Bartlets"). Tamién toz dos presidents son antigos profesors universitarios (d'Historia en a cinta, d'Economía en a serie) sin garra experiencia militar y con poca tolerancia a las conveniencias politicas.

Atras influyencias[editar | modificar o codigo]

A idea ta la serie de televisión Spin City ye consecuencia de que los guionistas veyesen a Michael J. Fox en The American President en interpretando a un d'os asesors politicos d'o president. Quereban que interpretase a un personache pareixiu ta la televisión.[11]

En chinero de 2012, mientres que criticaba a qui alavez yera lo lider d'a oposición Tony Abbott en un discurso en o National Press Club en Canberra, Anthony Albanese (en ixe inte yera ministro d'o Gubierno d'Australia) plachió cuantas linias d'o guión de The American President.[12]

En abril de 2013, la columnista d'o The New York Times Maureen Dowd, fació un articlo en contrastando l'afanyo falliu d'o president Obama ta asegurar l'aprobación d'una lechislación enamplada de verificación d'antecedentes en o Senau, d'una man, y l'afanyo total de recolección de votos en The American President.[13] O president respondió a la columna en a cena de l'Asociación de Corresponsals d'a Casa Blanca de 2013, en destacando as críticas y planteyando una serie de preguntas retoricas a Michael Douglas, qui dició que se trobaba en l'audiencia, entre ellas, "Puet estar que vusté estase un actor en una fantasía liberal d'Aaron Sorkin?".[14]

En as eleccions presidencials de 2016, o candidato Ted Cruz parafrasió una parte de The American President cuano o candidato Donald Trump insultó a la muller de Cruz. Cruz declaró: "... y si Donald quiere peciniar en una baralla de caracters, ye millor que se quede con yo porque Heidi ye fuera d'o suyo alcanz", fendo referencia a lo discurso que pronunció lo president Shepherd sobre los ataques de Rumson a Sydney Ellen Wade.[15]

Premios[editar | modificar o codigo]

The American President recibió cuantos premios y nominacions, podendo-se destacar una nominación a lo Premio Oscar (Banda Sonora Orichinal de Musical u Comedia, Marc Shaiman) y cinco nominacions a los Premios Globos d'Oro (Millor Director, Rob Reiner; Millor Guión, Aaron Sorkin; Millor Actor de Musical u Comedia, Michael Douglas; Millor Actriz de Musical u Comedia, Annette Bening; y Millor Cinta de Musical u Comedia). Antiparte, l'American Film Institute tamién colocó a The American President en a 75ena posición en a suya lista AFI 100 anyos...100 pasions.

Premios[editar | modificar o codigo]

Premio Calendata Edición Categoría Premiau Notas
Premios Oscar[16] 1996 68ena edición Nominada a l'Oscar a la Millor Banda Sonora Orichinal de Musical u Comedia Marc Shaiman
Premios Globo de Oro[17] 1996 53ena edición Nominau a lo Globo d'Oro a lo Millor Director Rob Reiner
1996 53ena edición Nominau a lo Globo d'Oro a lo Millor Guión Aaron Sorkin
1996 53ena edición Nominau a lo Globo d'Oro a lo Millor Actor de Musical u Comedia Michael Douglas
1996 53ena edición Nominada a lo Globo d'Oro a la Millor Actriz de Musical u Comedia Annette Bening
1996 53ena edición Nominada a lo Globo d'Oro a la Millor Cinta de Musical u Comedia The American President
Premios American Comedy 1996 Nominada a l'American Comedy a l'Actriz mas Divertida en una Cinta Annette Bening
1996 Nominau a l'American Comedy a l'Actor Segundario mas Divertiu en una Cinta Michael J. Fox
Premios de l'Asociación de Criticos de Cine de Chicago 1996 Nominau a lo Premio de l'Asociación de Criticos de Cine de Chicago a lo Millor Guión Aaron Sorkin
Premios NBR 1996 NBR a las 10 Millors Cintas de l'Anyo The American President
Premios Producers Guild of America 1996 7ena edición Nominada a lo PGA a la Millor Cinta The American President
Premios Writers Guild of America 1996 48ena edición Nominada a lo WGA a lo Millor Guión Orichinal Aaron Sorkin

Se veiga tamién[editar | modificar o codigo]

Referencias[editar | modificar o codigo]

  1. (en) The American President en Internet Movie Database.
  2. (en) An "American" Defector, en EW.com, 21 d'octubre de 1994.
  3. (en) Michael Starr: Aaron Sorkin: I Was "Crack" Screenwriter, en Fox News, 1 d'agosto de 2001.
  4. (en) Linda Lee: Oval Offices, by Way of Hollywood, en The New York Times, 13 d'abril de 1997.
  5. (en) Michael Wines: Hollywood Finds a Presidential Role Model, en The New York Times, 12 de noviembre de 1995.
  6. (en) Anthony Kaufman: Veteran Actor-Director William Richert's Internet Crusades, en IndieWire, 13 d'abril de 2006.
  7. (en) The American President (1995) en Rotten Tomatoes.
  8. (en) The American President en CinemaScore.
  9. (es) José María Aresté: El presidente y Miss Wade, en Aceprensa, 27 d'aviento de 1995.
  10. (es) Eulàlia Iglesias: El presidente y Miss Wade. El piloto de "El ala oeste de la Casa Blanca", en SensaCine.
  11. (en) [https://web.archive.org/web/20170221131307/http://www.imdb.com/title/tt0115369/trivia Trivia de Spin City en Internet Movie Database.
  12. (en) Patrick Lion: My name is Anthony Albanese and I plagiarised The American President movie script, en The Dayly Telegraph, 26 de chinero de 2012.
  13. (en) Maureen Dowd: President Obama Is No Bully in the Pulpit - The New York Times, en The New York Times, 20 d'abril de 2013.
  14. (en) President Obama's White House Correspondents Dinner speech: full transcript, en The Washington Post, 28 d'abril de 2013.
  15. (en) Chris Grasinger: Ted Cruz quotes "The American President" in comeback to Donald Trump, en Mashable.com, 23 de marzo de 2013.
  16. (en) Ganadors y nominaus d'os Premios Oscar 1996 en a pachina web de l'Academia d'as Artes y as Ciencias Cinematograficas de Hollywood.
  17. (en) Ganadors y nominaus d'os Premios Globos d'Oro en a pachina web d'a Hollywood Foreign Press Association.

Vinclos externos[editar | modificar o codigo]