Tanga

Un tanga^[1] ye una pieza de ropa interior de dimensions raditas que tapa minimament a parti debantera d'o pubis y que deixa descubiertos os glutios.

Consiste en un trianglo, feito de tela u cuer, que s'alarga con una beta per cadagún d'os tres vertices, dica encertar-se en un punto que, en posar-se-la, se sitúa a la rematanza d'o esquinaz. O tanga propiament dito adhibe un altro trianglo chiquet que queda en a parti d'adezaga, chusto en o rancadero d'os glutios. Ta diferenciar-los, a lo que no leva o trianglet posterior li'n dicen tanguita (tangueta). A vegatas ye clamato, coloquialment, "fil dental". Tampoco no s'ha de trafucar con o tanga brasilero, que consiste en dos trianglos simetricos, un per a parti frontera y l'altro per a zaguera.

Etimolochía

O mes probable ye que a parola tanga, que se fa servir en totas as luengas d'a peninsula Iberica, i plegase per meyo d'o portugués procedent de bella luenga africana como la suahili.

Oríchens

Piezas de ropa pareixitas a las que huei se conoixen como tanga s'han emplegato dende fa sieglos, y continan emplegando-se, per diferents pueblos d'Africa, America d'o Sud, o sud-este asiatico y o Pacifico, con a fin de tapar y protecher os organos sexuals d'os dos sexos, en o que se conoix con a parola castellana taparrabos ("tapacodas").

Encara que os danzaires de striptease l'heban portata con anterioridat, l'uso d'o tanga ganó popularidat en Occident en as plachas brasileras en a decada de 1970. Con os abances en l'aliberación d'os costumbres en o respective a la libertat sexual, a pieza ha ito introducindo-se en tot lo mundo occidental.

Popularidat

En a decada de 2000, a proliferación d'o tanga como pieza intima de consumo ye estata meteorica, y se ye tornata un elemento destacato como pieza erotica y de fetichismo sexual. O feito que no se marque per debaixo d'os pantalons ha contrebuito a un uso mes regular de ropa cenyita en a muller. Encara que o suyo uso ye mayoritariament femenino, tamién se ye incorporata a la vestimenta intima masculina.

As zagueras tendencias d'a moda chovenil han dato encara mes protagonismo a lo tanga, a l'extremo de deixar-la visible per a parti posterior d'o cuerpo aproveitando l'aparición d'os pantalons de cintura baixa.

Tota ista popularidat no ye exenta de polemicas y descusions ocasionals en a sociedat en o tocant a l'uso d'a prenda en bels puestos publicos u per parti de misachas cada vegata mes chóvens.