Taenia solium

*Taenia solium*
Taenia solium
Denominacions populars
tenia humana
Clasificación cientifica
Reino:	Animalia
Filo:	Platyhelminthes
Subfilo:	Rhabditophora
Superclase:	Neodermata
Clase:	Cestoda
Orden:	Cyclophyllidea
Familia:	Taeniidae
Chenero:	Taenia
Especie:	T. solium

A tenia humana^[1] (nombre cientifico Taenia solium) ye una especie de platihelminto parasito d'a clase Cestoda, que vive en o bodiello chicot d'os sers humanos, a on mide normalment de 3 a 4 metros y produce una malautía dita teniasi. Chunto con Taenia saginata, ye una d'as especies conoixidas chenericament como solitaria, ya que normalment nomás se troba un solo cuco en o bodiello d'a persona infectada.

A suya forma larval, dita tradicionalment Cysticercus cellulosae u Cysticercus racemosus, ye responsable d'a cisticercosi.

Caracteristicas

Ye un cuco plan en forma de cinta dividiu en segmentos o proglotidos, de color amariella blanquinyosa; habita en o bodiello chicot, a on vive penchada a la paret a traviés d'un escólex (cabeza) piriforme con cuatre ventosas y un rostelo con una doble corona de ganchos. A grandaria d'o escólex ye parellana a la d'a cabeza d'una agulla de cabeza. A l'organo de fixación le contina o cuello, porción cherminal que da orichen a un conchunto de segmentos u proglotides que forman o estrobilo u cadena estrobilar. Os mas amanaus a o cuello son inmaduros y en aleixar-se d'o mesmo presentan una maduración progresiva. Cada proglotido tien os dos aparatos reproductors, con organos masculins y femenins bien diferenciaus, por lo que l'individuo se considera hermafrodita. No tien aparato dichestivo y s'alimenta por absorción d'os nutrients que dichiere l'ahuespador, a traviés d'o tegumento externo.

O proglotido ye una unidad de reproducción autofecundant y independient, que produce uevos que contienen embrions infestants; os proglotidos mas distals, que son os gravidos, presentan brancas uterinas plenas de uevos que le dan aspecto arboriforme; cadagún contiene una meyana de 50 000 a 60 000 uevos y por un regular se desprenden d'o estrobilo en cadenas curtas que s'eliminan con as feces. Os uevos son esfericos, miden de 30 a 45 micrometros y presentan cuantas membranas, como o vitelo, que nomás se presenta en os uevos inmaduros y que permite a obtención de nutrients. O vitelo cubre a l'embrioforo formando una cubierta con bloques embrioforicos; istos bloques son unidos por una proteína cimentant, lo que le da a o uevo una apariencia fisica radiada; a membrana oncosferal recubre a la oncosfera u embrión hexacanton dito asinas porque presenta tres pars de ganchos.