Taenia saginata

*Taenia saginata*
Taenia saginata
Denominacions populars
tenia bovina
Clasificación cientifica
Reino:	Animalia
Filo:	Platyhelminthes
Subfilo:	Rhabditophora
Superclase:	Neodermata
Clase:	Cestoda
Orden:	Cyclophyllidea
Familia:	Taeniidae
Chenero:	Taenia
Especie:	T. saginata
Descripción
Taenia saginata Johann August Ephraim Goeze, 1782

A tenia bovina^[1] (nombre cientifico Taenia saginata) ye una especie de platihelminto parasito d'a clase Cestoda, cuals formas adultas viven en as primeras porcions d'o bodiello chicot d'o sers humano, a on tienen normalment una largaria d'entre 4 y 12 m. A tenia bovina, chunto con Taenia solium, ye una d'as especies conoixidas chenericament como solitaria, ya que normalment nomás se troba un solo cuco en o bodiello d'a persona infectada. Produce una malautía dita teniasi, cual fase intermedia transcurre en o ganau vacuno, en o que produce una infestación cheneralment asintomatica, localizada en a musculatura de l'animal.

Morfofisiolochía

D'a mesma manera que toz os cestodos, a forma adulta ye un cuco segmentau que naixe d'o escólex u tozuelo, que se fixa a o huespede a traviés de 4 poderosas ventosas, ya que, a diferencia de Taenia solium, no tien ganchos.

A o escólex le sigue a porción cherminal u cuello, a partir d'a cual se desarrolla o estrobilo u cadena de proglotidos, nombre con o que se designa a cadagún d'os segmentos que la forman. A mida que istos proglotidos s'aleixan d'o escólex se desarrollan en cadagún dos aparatos chenitals, o masculín y o femenín, ya que os individuos son hermafroditas. Dimpués de l'autofecundación l'aparato chenital masculín s'atrofia y se desarrollan os uevos u embrioforos adintro de l'utero, que ocupa practicament tot l'interior d'os proglotidos, os que, desapegando-se d'o estrobilo en chicotas cadenas, salen a l'exterior chunto con as feces d'o huespede u a traviés d'a suya propia acción motriz, lo que les permite atravesar o esfínter anal, caracteristica que no tién Taenia solium, amás d'estar mas curta y delgada. D'ista manera, os segmentos d'a tenia gosan estar vistos en a materia fecal, u apareixen apegaus en a ropa interior.