Correu vasuera

De Biquipedia
(Reendrezau dende Spam)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Una carpeta KMail plena de correus no deseyaus recibius en un curto periodo.

Os termins correu vasuera, mensache vasuera y a sobén tamién con l'anglicismo spam, fan referencia a os mensaches no solicitaus, no deseyaus u con remitente no conoixiu (correu anonimo), habitualment de tipo publicitario, cheneralment ninviaus en grans cantidaz (mesmo masivas) que perchudican de bella u cuantas trazas a o receptor. L'acción de ninviar ditos mensaches se denomina spamming. A palabra equivalent en anglés, spam, proviene d'a epoca d'a segunda guerra mundial, cuan os familiars d'os soldaus en guerra les ninviaban minchada enlatada; entre istas minchadas enlatadas se trobaba una carne enlatada gritada spam, que en os Estaus Unius yera y sigue estando muit común.[1][2] Iste termin prencipió a usar-se en a informatica decenios mas tarde a popularizarse, gracias a un sketch de 1970 d'o grupo de comediantes britanicos Monty Python, en a suya serie de televisiónMonty Python's Flying Circus, en o cual s'incluiba spam en toz os platos.[3]

Encara que se puede fer spam por distintas vías, a mas utilizada entre o publico en cheneral ye a basada en o correu electronico. Atras tecnolochías d'Internet que han estau obchecto de correu vasuera incluyen grupos de noticias, usenet, motors de busca, rez socials, pachinas web, wiki, foros, blogs, a traviés de finestras emerchents y tot tipo d'imachens y textos en a web.

O correu vasuera tamién puede tener como obchectivo os telefonos mobils (a traviés de mensaches de texto) y os sistemas de mensachería instantania como por eixemplo Outlook, Lotus Notes, Windows live, etc.

Tamién se diz correu no deseyau a os virus sueltos en o ret y pachinas filtradas (casino, sorteos, premios, viaches, drogas, software y pornografía), s'activa por meyo de l'ingreso a pachinas de comunidaz u grupos u accedir a vinclos en diversas pachinas u inclusivament sin antes accedir a garra tipo de pachinas de publicidat.

Historia[editar | modificar o codigo]

O correu vasuera por meyo d'o servicio de correu electronico naixió o 5 de marzo de 1994. Iste día una sinyatura d'advogaus, Canter and Siegel, publica en Usenet un mensache d'anuncio d'a suya sinyatura legal; o día dimpués d'a publicación, facturó amán de 10.000 dolars por casos d'os suyos amigos y lectors d'o ret. Dende ixe alavez, o marketing por meyo de correu electronico ha creixiu a livels impensados dende a suya creyación.

Encara que existen atras versions que datan o suyo orichen o 3 de mayo de 1978, cuan 393 emplegaus de ARPANET, o predecesor d'Internet chestionau por o gubierno estadounidense, recibiban con sorpresa un correu d'a companyía d'ordinadors DEC convidando-les a o lanzamiento d'un nuevo producto.[4]

O correu vasuera por meyo d'o fax (spam-fax), ye unatra d'as categorías d'ista tecnica de marketing directo, y consiste en ninviar faxes masivos y no solicitaus a traviés de sistemas electronicos automatizaus enta milars de personas u interpresas que a suya información ha estau cargada en bases de datos segmentadas seguntes diferents variables.

Historia d'o termin[editar | modificar o codigo]

A palabra spam tiene radices estadounidenses. A interpresa charcutera estadounidense Hormel Foods lanzó en 1937 una carne en lata orichinalment clamada Hormel's Spiced Ham.[5] O Spam (d'a contracción de "Spiced Ham", en espanyol "jamón con especias") estió l'alimento d'os soldaus sovieticos y britanicos en a Segunda Guerra Mundial, y dende 1957 estió comercializado en latas que cabidaban a o consumidor l'uso d'o abrelatas.

Mas abance, o grupo britanico Monty Python empecipió a fer burla d'a carne en lata. En un sketch d'o suyo programa Monty Python's Flying Circus, cuan una parella intentaba pedir minchada en una cafetería, se trobaba con que toz os platos d'o menú conteneban spam: «Uegos con tocino; uegos, salchicha y tocino; uegos con spam; uegos, salchicha, tocino y spam; spam, tocino, salchichas y spam; spam, uegos, spam, spam» — y asinas succesivament.[6] Un grupo de vikingos (a mayor productora de Spam en Europa yera una companyía danesa) cantaba, sin motivo aparent: «Spam, spam, spam, quiesto spam, marabilloso spam».[5]

Anyos dimpués, cuan Internet prencipiaba a creixer, cualques usuarios inexpertos mandaban erroniament mensaches personals a toda una lista de correu electronico u a grupos de discusión —que podeban involucrar a cuantos cientos de personas— o que ocasionaba molestias y perda de tiempo (y dica de diners) a os de demás usuarios que recibiban ixe tráfico irrelevant y no deseyau. Seguntes Brad Templeton, enta 1993 belún cualificó ixas intromisions no deseyadas como spam: os mensaches yeran como o spam d'o sketch, en o cual brenca se podeba minchar sin toparse con o fiambre.[5][7]

Correu masivo en diferents meyos[editar | modificar o codigo]

En publicacions[editar | modificar o codigo]

Ye una tecnica de correu vasuera relativament nueva, que surte en puestos como publicacions d'os blogs. Consiste en deixar un comentario en una dentrada, que por lo cheneral no tiene cosa a veyer con a mesma sino que tiene vinclos a puestos comercials, u promociona bel producto. Akismet[8] ye un complemento ta WordPress que detecta automaticament os comentarios con tendencia a estar correu masivo.

En o correu electronico[editar | modificar o codigo]

O correu masivo suposa actualment a mayor parte d'os mensaches electronicos intercambiaus en Internet, estando utilizau ta anunciar productos y servicios de dubdosa calidat. Rolex, eBay y viagra son os afers d'os mensaches que compiten por o primer puesto en as clasificacions de spam.[9][10][11][12]

Usualment os mensaches indican como remitente d'o correu una adreza falsa. Por ista razón, no sirve de cosa contestar a os mensaches de spam: as respuestas serán recibidas por usuarios que brenca han de veyer con éls. Por agora, o servicio de correu electronico no puede identificar os mensaches de traza que se pueda discriminar a verdadera adreza de correu electronico d'o remitente, d'una falsa. Ista situación que puede resultar chocant en un primer momento, ye semellant por eixemplo a la cual ocurre con o correu postal ordinario: brenca impide meter en una carta u postal una adreza de remitente aleatoria: o correu plegará en cualsiquier caso. Manimenos, i hai tecnolochías desembolicadas en ista adreza: por eixemplo o remitente puede sinyar os suyos mensaches por meyo de criptografía de clau publica.

Os filtros automaticos antispam analisan o conteniu d'os mensaches buscando, por eixemplo, palabras como rolex, viagra, y sex que son as mas usuals en os mensaches no deseyaus. No se recomienda utilizar istas palabras en a correspondencia por correu electronico: o mensache podría estar cualificau como no deseyau por os sistemas automaticos anti correu masivo.[cita requerida]

En foros[editar | modificar o codigo]

O spam, dentro d'o contexto de foros, ye cuan un usuario publica bella cosa que desvirtúa u no tiene cosa a veyer con o tema de conversación.[13] Tamién, en cualques casos, un mensache que no contribuye de garra forma a o tema ye considerau spam. Una tercera forma de Spamming en foros ye cuan una persona publica repetidament mensaches sobre un tema en particular en una forma indeseyable (y prebablement emprenya) ta la mayor parte d'o foro. Finalment, tamién existe o caso en que una persona publique mensaches solament con a finalidat de incrementar o suyo rango, livel u numero de mensaches en o foro.

O spam en un foro d'Internet tamién se produz cuan un usuario publica comentarios que contienen vinclos u bel tipo de referencia enta bel puesto web u foro semellant, d'igual conteniu, u mesmo ajeno a o mesmo, asinas como cualsiquier atro obchectivo tipico de publicidat con l'obchectivo d'atrayer mas usuarios y visitantes a o mesmo.

En zagueras se son ubrindo filos especials dedicaus a o spam, ta que os usuarios que quieran postear no ralenticen os de demás filos. Istos filos dedicaus a o spam han cobrau verdadera importancia y resultan muit usaus, tanto ye asinas que cualques foros dimpués de tener-los largo tiempo decidioron eliminar-los a causa d'o feito que en muitas ocasions istos subforos u temas yeran muitos mas usaus que a resta de partes d'o foro prencipal, ye decir, mientres que en spam se posteaban mas de 50 mensaches diarios, en cualques casos, en a resta d'apartaus tasament s'aconseguiban 2 u 3 publicacions. D'aquí, s'han dispertau nuevos movimientos, que han desembolicau comunidaz en linia dedicadas 100% a o spam, como spamfestuy y espamearte, entre os mas añejos.

En os rez socials[editar | modificar o codigo]

Ye una nueva forma de correu vasuera que consiste en ninviar publicidat, ofiertas d'emplego, publicidat dreitament a os usuarios de rez socials profesionals sin que istos l'haigan solicitau u en os foros d'o ret social.

Dos eixemplos de correu no deseyau corporativo en iste sector son o ninvio d'invitacions no solicitadas a os contactos d'usuarios de Facebook, y a "respuesta automatica" con publicidat que aleatoriament se fa dende MSN Hotmail cuan belún ninvia un mensache a una caixa de dita corporación.

En rez de IRC[editar | modificar o codigo]

Tan antigo como o propio protocolo de IRC, o correu vasuera en rez de charras en linia prene auge a resultas d'a masificación de dito meyo de comunicación. Os mensaches no deseyaus en rez de IRC tiene un coste irrisorio y por tanto son objetivo prencipal de rez de distribución de contenius. Os mensaches mas habituals gosan tener por obchectivo a visita d'atras canals de chat, a visita de webs y a difusión en cheneral de contenius de pago. Recientment se constata l'aparición d'una nueva modalidat de spam que busca que l'usuario perceptor d'a publicidat use a telefonía mobil ta contractar servicios d'elevau coste. Ista practica ye penada por a Lei. En muitas ocasions ista actividat ye realizada por robots baixo pseudonimos atractivos ta clamar o ficacio de l'usuario. Son habituals os nombres como 'choven_guapa' u 'busco_amor'.

En correu postal[editar | modificar o codigo]

A tecnicas de bombardeyo publicitario han plegau tamién a os meyos convencionals de comunicación. A enorme baixada relativa d'os costes d'impresión en paper, dende un folletos d'una sola pachina dica un catalogo publicitario de cuantas decenas han feito que tamién o ninvio de correu no solicitau plegue por meyo de correu postal. De forma analoga a como ocurre en os meyos electronicos, an un usuario intresau en un producto que remite os suyos datos a una interpresa puede veyer-se bombardiau por publicidat no deseyada d'ixa u unatra interpresa, i hai interpresas especializadas en o buzoneo masivo y indiscriminau de publicidat. Ye habitual trobar en a caixa postal, publicidat no solicitada introducida masivament por interpresas especializadas u por os propios distribuidors finals. Istas accedeixen a las caixas tanto en a vía publica asinas como caixas situadas en zonas privativas.

En a vía publica[editar | modificar o codigo]

En a vía publica son tamién comunas as practicas de spam, sobre tot en as ciudaz. A colocación de publicidat en puestos no preparaus ta ixo suposa un grieu deterioro d'o meyo urbano: parez, postes, vehíclos son invadius por publicidat no solicitada que no en pocos casos acaba en o goso. As corporacions municipals pierden muitos diners por istas practicas ilegals exentas de control fiscal y amás invierten grans cantidaz de diners en a retirada y limpieza d'o material publicitario dispersado en o meyo. En os zaguers anyos s'ha extendiu o clamau "pegatinazo", practica consistent en colocar pegatinas con publicidat sobre o mobiliario urbano y as edificacions (servicios de zarrallería, fontanería y electricidat son os mas comuns) utilizando pegatinas con adhesivos muit potents y que se trencan si s'intentan retirar dificultando y encarindo a suya retirada.[cita requerida]

En os wikis[editar | modificar o codigo]

En os wikis, os usuarios frecuentan a fer spam en as discusions d'atros usuarios, blogs (tanto creyar-los como comentar-los) u en comentarios en a pachina de discusión d'un articlo. Prencipalment isto se tracta de vandalismo, pero cualques vegadas os usuarios son pedindo aduya ta que unatro wiki progrese. A mala intención no amaneixe siempre, como veyen, pero no deixa d'estar molesto ta os de demás.

En os chats[editar | modificar o codigo]

En os chats de rez socials, grupos, etc. o spam consiste en meter repetitivament lo mesmo u escribir sobre o mesmo tema de forma en a cual no se puedan leyer os mensaches d'os atros miembros d'o chat, causando una montanya de mensaches d'o mesmo remitente.

Referencias[editar | modificar o codigo]