Equus africanus

*Equus africanus*
Equus africanus
Denominacions populars
burro salvache africano, somero salvache africano
Estau de conservación
En periglo critico (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Perissodactyla
Familia:	Equidae
Chenero:	Equus
Especie:	E. africanus
Distribución cheografica
Distribución de l'Equus africanus

O burro salvache africano u somero salvache africano (nombre cientifico Equus africanus) ye un mamifero salvache d'o continent africano, pareixito a lo burro domestico, que anque hue se troba prou recluito en os países d'o nord-ueste d'Africa (Etiopía, Somalia y Eritrea), anque antes tenió un aria de distribución que incluyiba Sudán, Echipto y Libia.

Descripción

As suyas midas plegan dica 2 metros de largo, con entre 230 y 275 kg de peso. Tiene o pelo curto y de color grisa clara, con una raya escura que s'estira dende a clavera dica la coda (igual como os burro) y con rayetas negras en as patas, por debaixo d'o chenullo. A subspecie nubia (Equus africanus africanus) tiene, amás d'a francha lonchitudinal d'a esquena, unatra que le baixa por o huembro, que anque son compartidas con bels burros, no se troban en l'atra subspecie (E. a. somalicus).

Os burros africanos viven por un regular en ambients deserticos u semideserticos, a on que nomás os suyos estomagos pueden sacar bella cosa d'a pastura que obtienen. Os sistemas dichestivos d'estes animals son duros y sacan l'augua de poca cosa que coman. Se conoixe que pueden tamién tirar a saber-los días sin gota d'augua. A diferencia d'a mayoría d'equidos, os burros africanos no precisan mica companyía, y se mueven habitualment solos (difueras d'as fembras con pollinez), y nomás cuan se troban solos fan servir a voz suya, que ye prou grau y asinas se claman os uns con os altros en a distancia (dica 3 km).

Tamién s'ha pensato que os burros africanos podesen estar os antipasaus d'os burros domesticos. Se conoixe que os sumerios ya en heban feito uso dende fa sieglos, que os meteban a estirar vagons y carros. Altros autors piensan que ixes habioron d'estar onagres u especies de burros ya mas modernos.

O estato de conservación actual d'a especie ye dramaticament perigloso ta la suya supervivencia. As capturas masivas que denantes se'n heban feitas ta domesticar-los y tamién l'entrecruz con os somers domesticos han feito que actualment no en queden si que unos poquez cientos. A mas, en Somalia y Etiopía, a on que os cazan ta usar-los en a medicina tradicional, o incremento d'armas en circulación con as recients guerras civils no ha feito si que estimular o descenso poblacional d'esta especie. A competencia, finalment, con o bestiar domestico ta sacar-ne pastura d'o suyo duro habitat ha feito declinar encara mas a demografía que teneba.