Solifluxión

De Biquipedia
Ir ta: navego, busca
Chicots lobulos de solifluxión en Suiza.

A solifluxión ye un tipo de movimiento de ladera en suelos archilencos saturaus en augua en o que se suman a reptación y o fluxo. Son chicotz fluxos viscosos y lentos de suelos cayendo costera entabaixo en forma de lobulos individuals que pueden levar a vechetación enradigada. Se producen d'una traza intermitent en cada ciclo de chelo-deschelo, asobén en primavera con o mayenco, quan a nieu se reviene y os suelos son embadinaus. Son tipicos d'o sistema morfoclimatico periglacial, pero no exclusivos.

En o Sistema Iberico a solifluxión se produce actualment, y ye fácilment observable en la costera nordeste d'o Puerto de Quarto Pelado[1], amán de Cantaviella. En l'ueste d'a Sierra d'Albarrazín os lobulos de solifluxión retienen l'augua, o suelo s'embadina y se forman paúls en a redolada de Bronchals y Oriuela, que por ixo prene o nombre del Tremedal. Tamién en a Muela de Sant Chuan se producen fenomens de solifluxión en os materials terrichens de facies Weald y en as arenas d'Utriellas.

En o Pireneu se fan lobulos de solifluxión en nuitos puestos, podendo-ne veyer en Tramacastiella de Tena amán d'o Entibo d'Escarra y en Fanlo en a costera norte d'a Sierra Custodia.[2]

Referencias[editar | editar código]

  1. Jose Luís Peña Monne et al. "Geomorfología de la Provincia de Teruel". Instituto de estudios turolenses, 1984. pp 138
  2. Fernando Biarge, José María García Ruiz, Ana Biarge Roca viva. El modelado del paisaje pirenaico. Diputación de Huesca, 2001. pp214

Bibliografía[editar | editar código]