Reserva Natural d'as Saladas de Chiprana

Saladas de Chiprana

Lacuna salada de Chiprana
Datos chenerals
Tipo	Reserva Natural
Establiu	30 de noviembre de 2006
Superficie	154 ha
Situación
Situación	Baixo Aragón-Casp
Latitut
Lonchitut
Mapa

A Reserva Natural d'as Saladas de Chiprana ye una reserva natural d'Aragón. Se troba situata de tot en o municipio de Chiprana, en a comarca de Baixo Aragón-Casp. Fue declarata como espacio natural protechito en l'anyo 2006 y tien una superficie de 154 ha, con una Zona Periferica de Protección de 360 ha.

Se tracta d'un complexo endorreico formato por 6 basas: a Salada Grande de Chiprana, a Salada de Roces, o Prado del Farol y atras tres mas chicorronas. A Salada Grande ye o solo eixemplo de lacuna d'istas caracteristicas y de gran fundaria en Europa, ya que l'altaria maxima d'o ran de l'augua gosa estar de dica 5,6 m en mayo. As suyas auguas son prou salinas y son transparents lo que permite, en dentrar a luz o sol a fotosintesi d'as especies vechetals que i viven.

Cheolochía

O entorno ye formato por materials terciarios, d'orichen continental. Destacan as formacions de paleocanals que rodian y trescruzan a lacuna, antigos cauces de ríos hue fosilizatos. L'augua ha erosionato os materials mas tovos como os salagons y archilas que rodiaban istos cauces de piedra panal.

Fauna

As condicions de vida ta fauna en iste entorno son prou dificils, por ixo no se i troban peixes, anfibios nian reptils. Destaca a presencia d'un chicot invertebrato, l'Artemia salina, que fa que en bellas epocas as auguas se tingan d'una color royenca.

A presencia d'aus acuaticas ye abundant, trobando-se-ie especies como l'aneda blanquinegra (Tadorna tadorna), o chifleta (Charadrius), a paixarica d'augua (Actitis hypoleucos), o barderet (Calidris minuta), l'alica de laberca (Circus aeruginosus), a garrapescaire (Ardea cinerea) y a garrapescaire royo (Ardea purpurea), l'algaraván (Burhinus oedicnemus), l'aneda final (Anas platyrhynchos), o capucete chicot (Tachybaptus ruficollis), a gavacheta caniella (Anas cyanoptera), l'anadeta (Anas crecca) y especies de gaviotas como a gaviota patiamariella (Larus michahellis) y a gaviota redidera (Chroicocephalus ridibundus).

Flora

En Europa, a *Ruppia maritima* nomás se puet trobar en Chiprana

A flora que bi ha en iste espacio natural ye adaptata a las grans cantidaz de sal de l'augua y as plachas d'o entorno. Se troban asinas plantas halofilas, que acceptan bien as grans concentracions salinas como a Salicornia sp., a Salsola sp. u a Ruppia maritima que nomás se puet trobar aquí en tot o continent europeu. Bi ha formacions de tamarizas^[1] (que a diferencia d'atros tamarizals d'a val de l'Ebro ye de tamariza de salada u Tamarix boveana y no de tamariza negra u Tamarix gallica).

Una mica mas luent d'a lacuna trobamos especies como a hierba garbancera (Colutea arborescens) u a sosa (Salsola oppositifolia) y Cytisus striatus. En zonas de menor salinidat tamién bi ha carrizos y chuncos. A zaguera francha de vechetación ye composata d'arbustos baixos mediterranios como tremoncillo (Thymus vulgaris), romero (Rosmarinus officinalis) u allagas (Genista scorpius), ta dar ya paso a zonas de cautivo de oliveras (Olea europaea) y reganos.