Refuchio de montanya

Un refuchio de montanya ye un edificio destinau a alochar y protecher de l'orache a alpinistas u excursionistas, que se sitúa en zonas de montanya, por un regular de dificil acceso, u en nuclios rurals. A mayoría d'istas instalacions son chestionadas por un club alpín.

Caracteristicas

As caracteristicas d'os refuchios de montanya son muit variables: existen refuchios muit basicos, d'o tipo dito bivac, que nomás consisten en un teito con parez, destinaus nomás a acubillar a os escaladors en zonas d'alta montanya.^[1] Se troban siempre ubiertos y cualsiquiera que los ameniste puet fer-los servir.^[2]

Os refuchios organizaus son a cargo d'un u mas emplegaus, y ufren servicios basicos d'alochamiento y venda de bella bebida y comidas.^[3] Son dividius en cuantas cambras independients, y son de fusta u piedra d'o mesmo puesto, encara que ocasionalment pueden estar de ladriellos, u estructuras prefabricadas. Gosan poseyer escusaus de tipo rustico, cocina comunitaria y alochamiento, compartindo a cambra con a resta de montanyers.^[2] En l'actualidat, a mayoría tien bella mena de chenerador electrico u panels solars, y contan con una emisora en caso de problemas. A mayoría d'os refuchios nomás son accesibles a piet u a caballo, encara que existen beluns a os que se i puet arribar con auto por camins precarios.^[4]

Enta zaguerías d'o sieglo XX se desarrolloron refuchios que incluyen servicios propios d'hotels, por eixemplo ufrindo comidas, encara que o suyo confort contina estando rustico.

A mayoría son propiedat d'un club alpín o club andino, que ufre descuentos a os suyos socios. D'a suya gestión s'encargan os guardas, nombraus por o club. Istos guardas pueden habitar en o refuchio de forma permanent u bien, por o suyo difícil acceso u mientres a temporada d'hibierno, ocupar-se periodicament d'o suyo mantenimiento.