Radiotelescopio

De Biquipedia
Ir a la navegación Ir a la búsqueda
O radiotelescopio Yevpatoria RT-70 que se troba en a Peninsula de Crimea.

Un radiotelescopio ye una antena y un receptor de radio especializaus que s'utilizan pa detectar ondas de radio de fuents de radio astronomicas en o ciel. Os radiotelescopios son o prencipal traste d'obserbación utilizau en a radioastronomía, que estudeya a porción de radiofreqüencia de l'espectro electromagnetico emitiu por obchectos astronomicos, igual que os telescopios opticos son o prencipal traste d'obserbación utilizau en l'astronomía optica tradicional que estudeya a porción d'ondas de luz de l'espectro procedent d'obchectos astronomicos. A diferencia d'os telescopios opticos, os radiotelescopios se pueden utilizar tanto de día como que de nueit.

Dau que as fuents de radio astronomicas como planetas, estrelas y galaxias son muit luen, as ondas de radio que provienen d'ellas son extremadament febles, por o que os radiotelescopios requieren antenas muit grans pa replegar suficient enerchía de radio pa estudiar-los, y equipos de recepción extremadament sensibles. Os radiotelescopios gosan estar grans antenas parabolicas semellants a las emplegadas en o seguimiento y a comunicación con satelites y sondas espacials. Os observatorios de radio s'ubican preferentment luen d'os prencipals centros de población pa privar l'interferencia electromagnetica (u EMI) de radio, televisión, radar, vehíclos de motor y atros dispositivos electronicos fabricaus por l'hombre.

As ondas de radio de l'espacio estioron detectadas por primera vegada por l'incheniero Karl Guthe Jansky en 1932 en Bell Telephone Laboratories en Holmdel (Nueva Jersey, Estatos Unitos), utilizando una antena construida pa estudiar o rudio d'o receptor de radio. O primer radiotelescopio especialment disenyau estió un plato parabolico de 9 metros construiu por o radioaficionau Grote Reber en o suyo patio trasero en Wheaton (Illinois, Estatos Unitos) en 1937. O estudeyo d'o ciel que realizó a ormino se considera o comienzo d'o campo d'a radioastronomía.