Río de la Pila

De Biquipedia
Ir a la navegación Ir a la búsqueda
río de la Pila
río Palomarejas
Administración
Estatos {{{estatos}}}
Territorios Flag of Aragon.svg Aragón
Cheografía
Longaria  km
Altaria d'o naixedero  m
Naixedero baixo l'alto de Chaparroso (Nogueruelas, Teruel)
Desembocadura Foces de Millars (Rubiuelos chunto a la muga con Sant Agostín y Olba, Teruel)
Superficie d'a cuenca km²
Cabal meyano m³/s


Lo río de la Pila u río Palomarejas ye un curso fluvial de la cuenca hidrografica de Millars que tiene lo suyo naixedero baixo l'alto de Chaparroso (una cima de 1.804 m d'altaria en la sierra de Nogueruelas), traviesa los termins municipals de Nogueruelas y de Rubiuelos en sentiu norte-sud, s'estretix y caye en Millars en lo termin municipal de Rubiuelos pero en frent d'un casal de lo termin municipal de Sant Agostín dito La Foz, que ye chunto a la muga con Olba y Rubiuelos. La muga entre Sant Agostín a lo sud y Rubielos-Olba a lo norte aproveita una foz gran protechida como PIC y dita Foces de Millars.

En lo cabalto de la suya cuenca hidrografica, lo río de la Pila y los suyos tributarios traviesan sierras de lo conchunto Chaparral-Nogueruelas pero menos altas y han escarvau foces en puestos como lo barranco d'el Focino y lo entibo de Balagueras,[1] dimpués traviesa la depresión tectonica de Rubiuelos, encara de la unidat morfoestructural de las "serranías de Gúdar".[2] La erosión produeita por los ríos de la Pila y Rubiuelos ha vuidau part de los materials sedimentarios miocenos d'esta fondada gran. Lo cabaixo de la cuenca hidrografica d'este río en contacto con lo río Millars ye una foz gran que perteneixe morfoestructuralment a la depresión de Sarrión, la unidat que desparte las serranías de Gúdar de lo macizo de Chabalambre.[2]

Una part de los reganos tradicionals de Rubiuelos corresponden a la cuenca hidrografica de lo río de la Pila. Lo entibo de Balagueras fue construito en 1957.[3]

Hidronimia[editar | editar código]

L'hidronimo río de la Pila s'emplega un poco encara, en bell mapa pa nombrar lo tramo auguas ent'alto de lo entibo de Balagueras. Se fa mención de lo río de la Pila en dos documentos de 1261 y 1266 a on que Chaime I prohibió a lo concello de Teruel que edificás poblacions nuevas en terrenos entre la sierra de Camarena y la sierra de Nogueruelas pa que fuesen pasturas:

...usque al cerro del Recuencho de Camarena, et usque ad collado de Pelamiços, et per medium vallis de la Casa, et de somo de la serra ad collado del Buey, et ad foveam del Taxo, et ad monionis de Turrios, et de eidem usque ad cabeço de les Cabres, et ad Valmala et Matam Dabre Cuesta, et de Mata Dabre Cuesta ad fozelleram Dabre Cuesta, et ad fondonem de los Sangrade, et ad caynadam de la Pila, et exinde cerro cerro usque ad vilarium de Pilos, et ad vilario de Pilos per rivum de Pilos usque a los demingos et usque ad turrem de las Acafes, et usque ad spinam de Can et ad Formig el Veio,... (1261)
idcirco per nos et nostris damus et concedimus vobis, toti concilio Turolii et aldearum suorum, imperpetuum, quod de rivo de Pilis usque ad rivum qui dicitur Sangraderos, prout dividit terminus de Sarrione, nec in tota serra de Javalambre prout aque vertuntur usque ad flumine de monte de las Eras, nec usque ad summum vallis de la Casa, nec usque ad summum vallis de Adenisch, prout aque vertuntur et prout vadit cerro cerro a los Labredales, nec prout aque vertuntur ad terminum de Cubla et de las Pobediellas, et exit ad fontem Regis, et de dicto fonte Regis cerro cerro usque ad portum de Casedon, et usque ad foz d'Andurria, et prout vadit caminum vetus apud Moram, et exit ad Tejares de Formig et ad Joncosam, et prout vadit dictum caminum vetus de Mora usque ad turrem de las Alcasas, et deinde prout dividit terminus de Mora usque ad predictum rivum de Pilis, non fiat de cetero alique populatio vel aldea,...(1266)

En l'actualidat la denominación rambla de Palomarejas u río Palomarejas s'emplega muito. Se puede documentar este hidronimo ya enta los sieglos XVI y XVII.

..., a razón de ocho sueldos por traer dichas llatas hasta el rio de Palomarejas, que a dicho precio hazen suma de ciento y veynte sueldos...[4]

Palomareja ye una forma sufixada de palomar con -eja, y con lo mesmo orichen que lo sufixo -ella. En aragonés terolano baixomedieval yera un diminutivo freqüent y no yera despectivo como en castellán postmedieval d'Aragón.[5] Semanticament se puede interpretar como atros microtoponimos de foces y barrancos con la palabra palomera en l'Alto Aragón, que tienen ripas altas y abrigadas que cobillan palomos.[6] Entre lo Rincón d'Ademuz y Lo Cuervo (Comunidat de Teruel), se torna a trobar lo hidronimo rambla de la Palomareja.

Se documenta un río de la Torre d'el Trillo correspondient a un tributario suyo en un texto baixo-medieval que fa referencia a los boalaches de Rubiuelos:

Primerament comiençan los mojones segun se sigue en el rio de la Torre el Trillo assi como va el camino de Sarrion e asoma del cerro e el cerro arriba assin como las aguas vierten al regajo de Mora en tro al cerro de la Felipia e responde a la punta de la era de Domingo Barberan efiere en los cabeços de tramos los regajos e a la pieça de Domingo Capater e torna a los cabecos de entramos los regajos...[7]

Referencias[editar | editar código]

  1. (es) José Luis Peña Monné, Luis Alberto Longares Aladrén, Marta Espinalt Brillas: Paisajes naturales de la provincia de Teruel. Guía del medio natural. Instituto de Estudios Turolenses, 2000. ISBN: 84-86982-97-9. pp 107-109.
  2. 2,0 2,1 (es) Jose Luís Peña Monné et al. : Geomorfología de la Provincia de Teruel. Instituto de estudios turolenses, 1984. p. 80, pp. 86-87.
  3. (es) Jorge Hermosilla Pla (dir.): El regadío tradicional y el patrimonio hidráulico del Alto Mijares turolense. ESTEPA (Estudis del Territori i del Patrimoni), 2011, pp. 97-101.
  4. (es) Concha Lomba: La casa consistorial en Aragón: siglos XVI y XVII. Volumen 10 de Colección Estudios y monografías. Editor: Diputación General de Aragón, Departamento de Cultura y Educación, 1989, p. 303.
  5. (es) Javier Terrado Pablo: La lengua de Teruel a fines de la Edat Media. Instituto de Estudios Turolenses, 1991.
  6. (es) Fernando Biarge López, Aurelio Biarge, José Antonio Cuchi, Enrique Salamero: Cañones y barrancos. Un medio excepcional. Editorial: El Patrimonio Natural Altoaragonés, Uesca, 2005, p 21.
  7. (es) Germán Navarro Espinach Rubielos de Mora en la Edad Media. Volumen 1 de Monografías turolenses. Editor: Instituto de Estudios Turolenses, 2005 p. 176.

Bibliografía[editar | editar código]


Ríos de la cuenca hidrografica de Millars
Marguin izquierda Cedriellas | Alcalá | Mora | la Pila | Rubiuelos | Erch | Cortes | Linars | la Viuda
Marguin dreita Penyaflor | Albentosa | el Barruezo | Montán | Chico