Ir al contenido

Pyrrhula pyrrhula

De Biquipedia
Pyrrhula pyrrhula
Un capellanet u cardenal (Pyrrhula pyrrhula).
Denominacions populars
capellanet, cardenal [1], abadet [2]
Estau de conservación

Seguro (IUCN)
Clasificación cientifica
Animalia
Chordata
Aves
Passeriformes
Fringillidae
Pyrrhula
P. pyrrhula
Descripción
Pyrrhula pyrrhula
Linnaeus, 1758
Distribución cheografica
Distribución d'o capellanet u cardenal.

O capellanet u cardenal (Pyrrhula pyrrhula) ye una especie d'au forestal, omnivora, de facil reconoixer por a suya chocant coloración royisca en o peito y os tuixos. Ye relativament frecuent en as selvas montanas atlanticas d'o tercio norte peninsular. Perteneix a l'orden d'os Passeriformes y a la familia Fringillidae, y gosan tener una longaria de 14,5 a 16,5 cm.

Identificación

[editar | modificar o codigo]

O masto de capellanet se conoix fácilment por o royo intenso d'o suyo peito y tuixos. A fembra tamién se reconoix sin guaire dificultat, encara que presenta una coloración mas amortada. Antimás, toz dos sexos poseyen una ampla boina negra que cubre toda la parte superior d'a cabeza y se prochecta enta lo pico, igualment negro y curto. Tamién son negras a coda y as alas, istas zagueras amplas y con una conspicua banda blanca. En contraste con ellas, en vuelo destacan a rabada, que ye blanca y o dorso de color grisa cenisa.

O repertorio d'o masto en primavera no resulta guaire melodioso, con una sencilla combinación de notas largas y vibrants; emiten un reclamo simple, un agudo y profundo "buiiii". As fembras tractan d'imitar-los, encara son mas curtos y febles, y a vegadas van acompanyaus d'un chasquiu.

Actualment se reconoixen nueu subespecies, que amaneixen en as selvas templadas d'Europa y Asia, dende Gran Bretanya dica Chapón. Arredol d'a Mediterrania, o cardenal se localiza fundamentalment en as montanyas, y mientres l'hibierno ixampla a suya aria de distribución enta lo sud.

En a peninsula Iberica as poblacions observadas s'adscriben a la subespecie P. p. iberiae. Cría en a practica totalidat d'o tercio norte peninsular: Galicia, todas dos vesants d'a condelera Cantabrica, o Sistema Iberico norte (Sierra de la Demanda, Cameros, Neila, Urbión) y tot o Pireneu y Prepireneu, dende Navarra dica a metat occidental de Chirona, incluindo o macizo d'o Montseny. D'hibierno se rechistra por toda la peninsula, fueras d'en territorios aridos u desarbolaus.

En o periodo de cría s'estableix en ambients frescos y humidos, mesmo oceanicos que continentals. Ye frecuent mesmo en selvas de frondosas caducifolias que en a taiga. En Espanya s'instala en fabars, caixicars, selvas mixtas, pinars de pino albar, abetars y riberas.

Desplazamientos

[editar | modificar o codigo]

Ye un migrador parcial. As poblacions mas septentrionals de Rusia migran enta lo sud en hibierno. A resta d'as poblacions europeas baixan en altitut y, amás, migran enta la cuenca mediterrania. En Espanya, a especie s'observa entre l'agüerro y l'hibierno mesmo en cotas baixas d'a metat norte que en a metat sud peninsular. Igualment, en agüerro y a primers d'a primavera se rechistra un paso moderau d'eixemplars que cruzan enta la Mediterrania.

D'alcuerdo con os datos replegaus en l'Atlas de las aves reproductoras de España (2003), a población europea de capellanez s'estima en 3,2-15 millons de parellas, mientres que en o continchent iberico serían presents 118.000-170.000 parellas, con una tendencia lleument positiva en os zaguers anyos, seguntes os resultaus d'o programa SACRE en 2005. Encara que en Espanya ocupa un amplo territorio, no se tracta d'una au abundant, y as densidaz rechistradas (0,3-3,3 aus por cada 10 hectarias) son siempre muit baixas en comparanza con as d'atros muixons forestals.

Alimentación

[editar | modificar o codigo]

Se tracta d'un muixón omnivoro. Gosa minchar simients de frutos carnosos, pero tamién fruitos secos, incluindo samaras de fraixins. En verano completa la suya dieta con insectos, mientres que en hibierno y prencipios d'a primavera ye un avido consumidor de chemas d'arbols friutals (cirgüelleros, manzaneras) y d'arbols caducifolios silvestres (fraixins).

Reproducción

[editar | modificar o codigo]

Cría habitualment dos vegadas a l'anyo, y en condicions favorables puede mesmo plegar a poner tres vegadas. A reproducción prencipia entre abril y mayo y finaliza mientres o verano, encara que i hai citas de cría en agüerro. Iste muixón d'ambients arbolaus triga arbustos, sobre tot de fuella perenne, ta posar-ie lo niedo. A fembra lo construye con ramas muit finas; en o suyo interior coloca con mas cudiau radices finas y pelo. A puesta se composa de cuatro a seis uegos, que son blancos u de color azul palida. Mientres a coba, que dura 12-14 días, o masto alimenta a la fembra. Tamién él nutre a los pollez en a suya primera semana de vida, ta dimpués compartir dito quefer con a fembra mientres un par de semanas mas.

Bibliografía

[editar | modificar o codigo]

Referencias

[editar | modificar o codigo]

Vinclos externos

[editar | modificar o codigo]