Pueblos castigatos

De Biquipedia
Ir a la navegación Ir a la búsqueda

Os pueblos castigatos ye a denominación comun pa diferents pueblos que fueron deportatos por orden de Stalin mientres u dimpués d'a Segunda Guerra Mundial acusatos de colaborar con as Potencias de l'Eixe, a vegatas falsament.

Antecedents[editar | editar código]

En chunio de 1941 os alemans creboron con o Pauto Ribbentrop-Molotov y invadioron Ucraína y Crimea (Operación Barbarroya). En chulio de 1942 Hitler ordenó una ofensiva pa conquerir Stalingrado y una doble ofensiva en o Caucas, por tota a costa dica Batum y por tot o norte d'a cordelera dica Bakú (on esperaban espleitar os chacimientos petroliferos).

As fuerzas alemanas abanzoron a escape por Ciscaucasia, pero no consiguiron prener ni Grozni ni Vladicavkaz. Pronto fuoron auturatas en a Mar Negra. A batalla de Stalingrado fue desastrosa en los alemans abioron d'evaquar o territorio que heban ocupato en o Caucas. Mientres os alemans yeran en o Caucas i heba poblacions locals que los recibioron como salvadors porque los liberaban d'a opresión stalinista y atras que lis ofreixioron resistencia. Os alemans teneban tamién o refirme de cosacos rusos y integrants de minorías etnicas exiliatos dende o periodo comunista u dica enantes, (tartres panturquistas y armenios) y preboron de reclutar tropas auxiliars con prisioners d'ixas minorías.

Deportacions[editar | editar código]

En agosto de 1941, en os alazetz d'a guerra en a Unión Sovietica, os alemans d'a Volga fuoron deportatos ta Cazaquistán. Quan os sovieticos ya iban ganando a guerra, Stalin ordenó a deportación de diferents pueblos, totz musulmans de fueras d'os calmucos, que yeran budistas. A escusa yera a colaboración con os alemans, pero d'ixos pueblos, bi n'heba beluns que no heban tenito contacto con os alemans (os meskhetas), u que heban constituito movimientos partisans contra os alemans (os chechens). En o caso chechén posiblement influyoron as revueltas antisovieticas d'as decadas de 1920, 1930 y 1940 que no teneban relación con os alemans. En realidat i heba un deseyo de fer desapareixer unas identidatz etnicas que Stalin chuzgaba periglosas pa controlar o sector entre a Mar Negra y Mar Caspia, (que a historia recient heba demostrato que yera vulnerable a la penetración d'ideyas u exercitos turcos u alemans). Totz ixos pueblos yeran incomodos tanto pa os rusos, pa os cheorchians u pa os dos.

En noviembre de 1943 fuoron deportatos os carachais, en aviento de 1943 os calmucos, en febrero de 1944 os chechens y inguixes, (425.000 presonas en un día), en marzo de 1944 os balcars, en mayo de 1944 os tartres de Crimea, en noviembre de 1944, os meskhetas. As operacions fuoron rapedas y afectoron a totz os individuos d'ixas etnias. S'imposó un silencio total sobre o tema.

As poblacions deportatas s'implantoron en zonas de poblamiento especial, aislatas d'as poblacions vicinas, quedando sozmesas a vichilancia, sin dreitos civicos y con prohibición d'amostranza en a luenga propia. Os calmucos fuoron ixemenatos por diferents localidatz entre poblacions rusofonas.

Rehabilitacions[editar | editar código]

En 1956 Nikita Kruschev denunció a deportación d'os calmucos, carachais, balcars, chechens y inguixes en o XX Congreso d'o Partito Comunista d'a Unión Sovietica. A fins de 1956 un decreto autorizó que ixos pueblos tornasen a lur tierra, cosa que se produció sobretot en 1959. A qüestión d'os tartres de Crimea, os meskhetas y os alemans d'a Volga quedó empantanata, y dica a descomposición d'a URSS no s'han produeito grans cambeyos. O gubierno d'a Ucraína independient permitió que bells mils tartres s'establisen en Crimea. Tamién bells meskhetas son tornando ta Cheorchia. Os alemans d'a Volga deportatos en Cazaquistán no pueden tornar a las riberas d'a Volga y emigran t'Alemanya.