Prochecto d'entibo en o río Susía

De Biquipedia
Ir a la navegación Ir a la búsqueda
O río Susía desemboca en a coda d'o pantano de o Grau, en as inmediacions de o Mesón de Ligüerre y Ligüerre de Cinca, poblacions ya afectadas por ixe atro entibo anterior.

O prochecto d'entibo en o río Susía ye un prochecto de construcción d'un entibo en a valle d'o río Susía contemplau por diferents administracions dende l'anyo 2002[1] dica l'anyo 2005,[2] quan se desestimó de forma no definitiva,[2] y tornau a planteyar en 2009 por a Confederación Hidrografica de l'Ebro[3] y Riegos del Alto Aragón.[3]

O prochecto d'entibo afecta a qualques lugars en a valle d'o río Susía, que fa parte d'o Viello Sobrarbe, en o sud d'a comarca de Sobrarbe. A dita valle se troba en as inmediacions de dos grans entibos, ya construius, que son o de Mediano y o de o Grau,[3] que ya suposón a despoblación forzosa de bells lugars en a redolada en os anyos 1960. O propio río Susía desemboca, en l'actualidat, en o entibo de o Grau, en os arredols d'o Mesón de Ligüerre.

Historia[editar | editar código]

O prochecto se fizo conoixer en o BOE en l'anyo 2002,[1] como conseqüencia de que l'anterior prochecto d'entibo en Chanovas obtenise una Declaración d'Impacto Ambiental negativa, por o que, legalment, no se podeba construir.[4] En mayo d'ixa mesma anyada[5][6] se fundó en Chabierre d'o Elsón, una d'as poblacions que heban de veyer-se afectadas, l'Asociación Río Susía, que d'entre os suyos obchectivos contempla fer una oposición activa contra qualsiquier prochecto d'entibo mas en a redolada.[6]

O prochecto quedó desestimau por razons no especificadas, anque nunca no se'n fizo garra anuncio oficial, en as zagueras semanas de l'anyo 2005, a tamas que en octubre d'ixa mesma anyada s'heba feito publico un presupuesto de 1,8 millons d'euros ta la inminent construcción.[7]

En aviento de 2009, a Confederación Hidrografica de l'Ebro fizo publico que teneba un nuevo prochecto d'entibo ta la cuenca d'o Susía.[3][8] En l'actualidat, y anque no i ha guaire información sobre o prochecto d'entibo, pareix que iste sigue en piet y encara una empresa constructora mantiene en a suya pachina web a ista obra como un d'os prochectos sobre os que son fendo estudeos.[9]

Problematica[editar | editar código]

L'obchectivo prencipal d'iste prochecto ye d'abastir d'augua ta fer nuevos reganos en a comarca d'os Monegros.[3] Manimenos, d'entre os argumentos que han emplegau os suyos detractors se cuenta o cabal d'iste río chicorrón, que no fa sique 16 km de lonchitut[2] y per se ye propenso a l'estiache,[2] por o que dificilment podría proveyer volumens d'augua acceptables ta transvasar ta os Monegros en as epocas que mas se'n amenista.[3]

Unatra qüestión ye a presencia de volumens d'augua desaprofitaus en o vicino pantano de o Grau, que ya ye construiu, y a on que, d'alcuerdo con l'Asociación Río Susía, i ha un important volumen d'augua no aprofitable porque a canal de derivación d'os reganos que s'alimenta d'ell ye mas alta que a cota menima de l'entibo.[3] Seguntes l'asociación, a solución de menor impacto, ecolochico y social, pasaría por amillorar os mecanismos d'aprofitamiento de l'augua que ya i ha entibada en os pantanos d'a redolada, como podría estar si se i instalase un mecanismo de bombeyo de l'augua de cotas mas baixas de camín ta os canals de derivación.[3]

Referencias[editar | editar código]

  1. 1,0 1,1 (es) SANTOS DE LAS HERAS, José María; Del presente y del futuro (cap. V en Comarca de Sobrarbe -Num. 23 en a Colección Territorio-). Gobierno de Aragón; Zaragoza, 2007. ISBN 84-7753-630-9. O capítol puede leyer-se en linia aquí.
  2. 2,0 2,1 2,2 2,3 (es) SOLSONA, Fernando (coord.). ("Asociación Río Susía"). Descubriendo el valle del río Susía. Ed. PRAMES; Zaragoza, 2008. ISBN 978-84-8321-972-0
  3. 3,0 3,1 3,2 3,3 3,4 3,5 3,6 3,7 (es) Noticia «La Asociación Río Susía trabajando sin pausa» de 16 d'aviento de 2009; consultada o 3 d'agosto de 2011.
  4. (es) Noticia «Los afectados por el embalse de Susía expresan sus dudas a Marcelino Iglesias», de 23 d'octubre de 2002; consultada o 3 d'agosto de 2011.
  5. (es) Panel informativo sobre a valle d'o Susía; consultau o 3 d'agosto de 2011.
  6. 6,0 6,1 (es) Asociación Río Susía; consultada o 3 d'agosto de 2011.
  7. (es) Noticia «Medio Ambiente destina casi dos millones al embalse del Susía» d'o 25 d'octubre de 2005; consultada o 3 d'agosto de 2011.
  8. (es) Note de Prensa de l'Asociación Río Susía; de 26 d'aviento de 2009; consultada o 3 d'agosto de 2011.
  9. (es) «Referencia de Proyectos. Obras hidráulicas»; consultada o 3 d'agosto de 2011.

Vinclos externos[editar | editar código]