Pinetas de pin borde en carasols de zonas submediterranias

De Biquipedia
Ir a la navegación Ir a la búsqueda

As pinetas de pin borde en carasols de zonas submediterranias son formacions d'esta especie presents en o Prepireneu, (mui especialment en a redolada de L'Ainsa) y Sistema Iberico, (plegando a la cuenca alta d'o Tacho y Sierra d'Altomira). O pin borde ye una especie termofila que penetra en estas zonas a traviés de vals entallatas y fuesas tectonicas més protechitas d'o clima continentalizato y més frido propio d'ixas zonas. Este clima més frido permite que o pin borde s'asocie con bellas especies de Quercus marcescents como Quercus faginea. Estas pinetas creixen sobre suelos calsinosos de solana con substrato de calsinera u dolomía, y a sobén con intercalacions de salagón. No representan formacions submediterranias, representan formacions termofilas mediterranias que penentran en o dominio submediterranio.

O feito que sigan en solanas y a sequedat edafica que dan as calsineras y o suelo calsinoso fan que i haiga un matical més termofilo que a redolada, con romero, sabina mora, o chinebro Juniperus oxycedrus, a cornicabra, a senera, o coscollo y l'alatierno. En o estrato arborio puet haber-ie ha presencia de diferents especies a parte d'o pin borde: pin nasarro, pin rodeno, caixicos marcescents y carrasca.

A pineta de La Encomienda de Castilla en Madrit perteneixe a este tipo de pinetas, que tienen a Cuenca d'o Tacho en Madrit o cabo ueste de distribución.

En a Sierra d'Altomira y l'Alto Tacho estas pinetas pueden plegar dica cotas topograficas de 900–1000 m. En l'Alto Tacho estas pinetas s'han estendillato en muitas zonas potencials d'o carrascal y d'o caixicar, degradatas por a erosión, as talas y os incendios, o mesmo que en o Prepireneu, estando estas pinetas una part important d'o paisache vechetal d'o fondón d'a Cinca en a redolada d'o entibo de Lo Grau.