Pineta de Val de Gurriana

De Biquipedia
Ir a la navegación Ir a la búsqueda
Pineta de Val de Gurriana
Inclusas de Val de Gurriana.jpg
Inclusas de Val de Gurriana
Datos chenerals
Tipo Pineta
Establito
Superficie
Situación
Situación Flag of Aragon.svg Torrero, Zaragoza
Latitut
Lonchitut
Mapa
Mapa de Zaragoza.svg
Map pointer.svg

A Pineta de Val de Gurriana ye una pineta que se troba en o sud d'a ciudat de Zaragoza, en os monts de Torrero. A selva ye formata por pins d'as especies Pinus pinea y Pinus halepensis.

A Canal Imperial d'Aragón trescruza istas pinetas y bi ha amás unas inclusas que permitiban a os barcos que i pasaban salvar o desnivel d'a zona. Chusto antis d'as inclusas se troba l'almenara de Sant Bernal y un chicot parque con a-saber-los árbols. O relieu ondulato se debe a la erosión d'os materials de cheso tipicos d'a val de l'Ebro.

O camín que recorre Val de Gurriana fa parti actualment de l'Aniello Verde de Zaragoza.

Inclusas de Val de Gurriana[editar | editar código]

Grabato antigo d'as inclusas
A Canal en as antigas inclusas de Torreciella

As inclusas de Val de Gurriana se troban situatas en o punto kilometrico 89 d'a Canal Imperial d'Aragón. Fuoron construitas entre os anyos 1786 y 1790. L'obchectivo d'istas inclusas yeran que as barcas podesen puyar enta a parti alta d'a canal.

Se composan de quatre saltos d'augua y os correspondients quatre cuencos u cambras con planta eliptica y con una capacidat cadaguna ta dos barcas grans. O desnivel de cada salto ye de 3,25 metros, fendo un total de 13 metros tot o conchunto. As inclusas son feitas de piedra picata.

Bi heba puertas de fusta granizas de 6,5 metros en cada cambra que premitiban zarrar-la y plenar-la d'augua. Cada puerta se dividiba en dos fuellas que en ubrir-sen s'achustaban a os laterals d'a cambra ta deixar pasar a las embarcacions.

O tiempo total d'a operación d'ubrir as puertas, zarrar-las, plenar a cambra y tornar a ubrir a puerta de l'atro canto d'a cambra yera de 8 menutos. As compuertas que hue ya no se conservan fuoron destruitas y crematas en a Guerra d'o Francés por o exercito invasor.

Dende iste punto a canal s'estreita, convertindose en una cequia. O motivo estió a mala calidat d'o terreno, mas que mas en os campos de Lo Burgo d'Ebro de cheso, por os que no podeba pasar a canal. Malas que l'augua mullaba a tierra a canal se produciban torrocatas sobre ista y foratos por debaixo. Se facioron prebatinas ta impermeabilizar o terreno en o sieglo XVIII, pero a manca d'un estudio cheolochico apropiato fació que s'hese d'albandonar a ideya de fer a canal navegable dica a suya desembocadura.

Scouts en Val de Gurriana[editar | editar código]

Val de Gurriana s'asocia dende siempre a o movimiento scout u escultismo de Zaragoza. A pineta, as inclusas y as espelungas que bi heba en ista zona d'o mont de Torrero (y que hue son espaldatas) estioron mientres os primers anyos d'o sieglo XX o scenario d'as actividatz d'o grupo d'Exploradors d'Espanya, os primers scouts que s'establioron en o país. En l'anyo 1931 o Concello de Zaragoza concede a iste grupo l'uso d'una parcena en Val de Gurriana. Por istas envueltas yera dificil marchar luent ta fera ctividatz a l'aire libre, asinas que o grupo aproveitaba os monts de Torrero que yeran bien amán.

A Guerra Civil fació que se paralizasen as actividatz d'os Exploradors y en 1940 o grupo desaparixió. Vente anyos dimpués y a tamas d'a prohibición d'a dictadura se creyó o Grupo Scout Sant Chorche, que se deciba oficialment "Grupo Infantil Montanyers d'Aragón" y que prencipió as suyas actividatz atra vegada en Val de Gurriana o 23 d'abril de 1960, día nacional d'Aragón. Dende alavez y mas encara dende a suya legalización en 1977 os scouts continan visitando as pinetas.

O 10 d'octubre de 2010 s'inaugura un molimento monolitico adedicato a movimiento scout, obra d'o escultor Alberto Pagnussatt y en 2011 se creya o sendero scout de Val de Gurriana que une o barranco d'a Muerte con as inclusas de val de Gurriana.

Vinclos externos[editar | editar código]