Paye

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Una mesacha y su paye templando un vriolín (olio sobre lienzo de Robert. W. Wright, 1893).

Paye, en as vals de l'alta Cinca en a comarca de Sobrarbe, ye un apelativo familiar con que a persona se nombra el propio agüelo. El suyo equivalent en femenino ye maye. S'emplega de traza apaicida a como en a resta de Sobrarbe, Ribagorza y Tierra Plana se fa marchar a parola «yayo» y «yaya», y como se fa con «lolo» y «lola» en Viello Aragón.

L'emplego de «paye» y «maye» ye extensament documentau en belsetán,[1] en chistabín,[2][3] y en es parlaches de la Comuna y Saravillo que i son en mel medio.[4]

  • L'anyo que se van morir paye y maye.
  • Cuan le'n voi preguntar a paye no s'acordaba.
  • Ta la guerra que se'n vayó paye fue en Cuba.

S'emplega por un regular como formula afectuosa pa referir-se a l'agüelo propio, el d'uno, pero bella vez (las menos) puede sentir-se aplicau a cualsiquier agüelo, en un sentiu que podría contar-se como sinonimo de parentesco con «agüelo»:

  • Qué-me-sé-yo si a'l paye le debrá de fer guaire gracia![3]

Por lo mas común «maye» y «paye» va siempre sin articlo adebant,[3] como tamién lo'n va atros apelativos familiars afectuosos en aragonés, como «papá» y «mamá» y en atros puestos «yayo» y «yaya». Manimenos, cuan s'emplega pa referir-se a es agüelos d'otri, alavez puede llevar-ne (veiga-se l'eixemplo d'antes).

Referencias[editar | modificar o codigo]

  1. BADIA i MARGARIT, Antoni Maria, El habla del Valle de Bielsa (Pirineo aragonés). Edición d'Artur Quintana. Aladrada ediciones. Zaragoza, 2015. ISBN 978-84-944335-5-9
  2. MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5
  3. 3,0 3,1 3,2 BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0
  4. GUILLÉN MUR, Joaquina y ROMANOS HERNANDO, Fernando. Más d'antes en Sarabillo. Bida y parlaje. Rolde de Estudios Aragoneses. Zaragoza, 2010. ISBN 978-84-92582-16-7.

Se veiga tamién[editar | modificar o codigo]