Pascual González Guzmán

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Pascual González Guzmán
Información personal
Calendata de naixencia 23 d'aviento de 1928
Puesto de naixencia Granada (Andalucía)
Calendata de muerte 13 d'aviento de 1985
Edat 57 anyos
Puesto de muerte Campotéjar (Granada)
Ocupación Profesor universitario

Pascual González Guzmán (Granada, 23 d'aviento de 1928 - Campotéjar (Granada), 13 d'aviento de 1985) estió un filologo y profesor andaluz d'universidat y d'ensenyanza secundaria conoixiu, en l'ambito de lo estudio de l'aragonés, por la suya tesi doctoral de 1952 sobre l'aragonés fablau en as vals d'Aragüés y Aísa, titulada El habla viva del valle de Aragüés, que li dirichié Manuel Alvar.

Biografía[editar | modificar o codigo]

Naixiu de Granada, yera licenciau en Filosofía y Letras por la Universidat de Granada en 1951. Impartié las clases practicas de Gramática Histórica y de Lingüística Románica de la dita universidat entre 1951 y 1953, anyo que publiqueron la suya tesi doctoral dirichida por Manuel Alvar, por allora profesor de la mesma universidat. Estió profesor adchunto de Lingüística Románica en la facultat de Filosofía y Letras de la universidat granadina dica 1959, en que se tresladó enta Almería en aprobada la oposición de catedratico d'ensenyanza secundaria.

Entre que remanié en la Universidat de Granada, González fizo parti y organizó diferents actividaz culturals pa l'alumnalla y los profesors de la facultat do treballaba, entre ellas bellas conferencias sobre poetas andaluces que yeran mal quiestos por lo réchimen franquista, como Antonio Machado, Federico García Lorca u Rafael Alberti.

Estió catedratico numerario d'ensenyanza secundaria en lo instituto «Nicolás Salmerón y Alonso» de la capital almeriense dende 1959 dica 1978, do estió Chefe d'Estudios varias veces y Director en dos ocasions. Tamién estió lo delegau provincial de Protección Escolar dende 1966 dica 1970, y delegau provincial de lo Ministerio d'Educación y Ciencia dende 1971 dica 1973.

En 1978 aprebó lo concurso-oposición de lo Cuerpo d'Inspectors d'Ensenyanzas Medias y prenié plaza en lo Districto Escolar de Granada, do seguiría los anyos siguients.

Lo 13 d'aviento de 1985 fenecié en un accident d'automóbil cuan se'n tornaba de Chaén enta la suya ciudat, a l'altaria de lo municipio de Campotéjar (Provincia de Granada), dimpués d'una reunión pa aprestar las prebas d'acceso a la universidat. Li faltaba diez días pa haber feito 57 anyos.

Distincions[editar | modificar o codigo]

En vida, Pascual González Guzmán heba recibiu la Medalla de Plata de la Juventud y la Encomienda de la Orden Civil de Alfonso X el Sabio.

Dimpués de morir, de la Universidat de Granada li otorgueron la suya Medalla d'Oro en reconoiximiento por la suya labor.

El habla del valle de Aragüés[editar | modificar o codigo]

Alumno de Manuel Alvar en los anyos que amostró en Granada, lo profesor y dialectologo valenciano, que heba publicau feba poco la suya tesi propia sobre El habla del Campo de Jaca, li sucherié de fer la suya proxima tesi doctoral sobre bella fabla d'una val de lo Perineu aragonés aprofitando las milicias universitarias de verano en Chaca en dó González tomaba parti.

Los materials fuoron replegaus en 1950 en Aragüés de lo Puerto, Chasa, Aísa, Esposa y Sinués, y la tesi la presentó lo 18 d'aviento de 1952 en la Universidat de Granada. La tesi li'n publiqueron en l'anyo 1953, a traviés de lo Instituto de Estudios Pirenaicos que allora yera vinculau con lo CSIC. Toz los informadors con qui charró González yeran mayors de 60 anyos y analfabetos, como requisito pa trobar una mayor pureza en lo dialecto que fablasen.

Antes de González Guzmán, la fabla d'Aragüés y Aísa nomás la heban estudiau brevement Jean-Joseph Saroïhandy, Alwin Kuhn y William Dennis Elcock. Dimpués d'él, lo lugar d'Aragüés estió localidat d'enquesta pa fer l'Altlas Lingüístico y Etnográfico de Aragón, Navarra y la Rioja (ALEANR) entre 1978 y 1983. A mas cal contar con la obra de poesía popular de José Gracia Expósito (1899-1981), que ye escrita en l'aragonés que se fablaba en Sinués, lo lugar d'él.

La fabla d'Aragüés en 1950[editar | modificar o codigo]

González constató la tremenda erosión que heba sufierto lo dialecto entre los anyos que heba pasau dende as enquestas d'os autors d'antes d'él (anyos 1930 en Kuhn y Elcock) y ixos intes. No podió documentar ya de raso formas tipicas de l'aragonés como o pronombre «qui», de raso substituyiu por o castellanismo «quién», ni o locativo aragonés occidental «do», tan normals sisquiera a principios de sieglo XX como los heba replegau Saroïhandy.

Tamién tenió problemas pa documentar formas verbals que yera regular trobar-se en decadas anterios, como as desinencias -etc y -oz en a segunda persona plural d'os verbos, que ya se feba -áis, -éis, mesmo en os verbos con radiz lexica aragonesa diferenciada d'o castellano: «vo'n vais», «yérais». Nomás en a val d'Aragüés se troba con a forma verbal «paguez», anque va de retaculas, y con as desinencias en -oz de lo perfecto simple, que en atros tiempos heban estau tipicas d'etas vals, en lo estudio de 1950 no se troba que con «dijioz» y «cantoz».[1]

Referencias[editar | modificar o codigo]

  1. GONZÁLEZ GUZMÁN, Pascual, El habla viva del Valle de Aragüés (Facsímil). Edición y estudio d'Alberto Gracia Trell. Aladrada ediciones. Zaragoza, 2018. ISBN 978-84-947712-6-2

Bibliografía[editar | modificar o codigo]