O Trango

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Esta pachina tracta sobre l'asociación cultural O Trango. Pa atros emplegos d'a palabra se veiga Trango (desambigación).

O Trango estió una asociación cultural que naixió en agosto de 2009 como colla de treballo por a luenga aragonesa, con a fin d'estendillar socialment a conoixencia d'ista luenga y as suyas caracteristicas, reivindicando igualment una millora d'a suya situación.

Estructura[editar | modificar o codigo]

Os obchectivos d'ista colla de voluntarios yeran: estar un rolde sin animo de lucro, fuyir de toda mena de politización tanto explicita como implicita, estar una asociación transparent d'a que pueda fer parti de todas as reunions u actividatz cualsiquier persona intresada en as mesmas, y denunciar o emplego d'a luenga aragonesa por parti de cualsiquier colla u particular con fines lucrativos u con l'esmo de sacar bel treslau.

Tot isto se feba dende una anvista critica de vez que constructiva en a que se miraban d'empentar accions de treballo de conchunta con atras personas u colectivos que treballan por a luenga aragonesa.

Mientras as suyas cuatro anyadas de treballo por l'aragonés, iste colectivo se caracterizó por fuyir d'a creyación d'un tarabidau cherarquico interno, autodeclarando-se colectivo asambleyarista en o que os cargo de president, secretario y tresorero nomás teneban una valor burocratica.

Asinas mesmo, y en ixe esprito de treballo desintresau y independient d'os grupos de poder que foten a la luenga aragonesa, os estatutos d'o colectivo rezaban:

O trango acceptará todas as opinions y ideyas tocants a custions "academicas" en l'aragonés. Asinas, no se estrableixerá ni grafía ni modelo d'aragonés concreto, aceptandose toz istos, en no estar ixa a finalidat de iste colectivo istas custions.

Accions por l'aragonés[editar | modificar o codigo]

En a suya primera anyada de vida, o plantiamiento d'ista entidat estió o de fer actividaz internas que contribuyisen a fortalecer a comunidat d'aragonesofablants, mirando de que personas no aragonesofablants intresaus en a luenga fesen parti también d'as mesmas. Asinas, l'obchectivo principal mientras os primers trangos d'o colectivo pasó por fer actividaz mensuals de diferents menas que permitesen a la chent aragonesofablant arroclar-se y fer servir a suya luenga, y en un segundo plano coordinar a resta d'autividaz feitas por parti d'atros particulars u colectivos ta que toz estasen enteraus y convidaus.

Manimenos, a monico l'asociación ha enamplau as suyas fainas, respondendo a las demandas de diferents grupos intresaus por conoixer a situación u caracteristicas d'a luenga aragonesa. Asinas, en 2010 O Trango empentó o suyo primer curso de luenga aragonesa, que tenió puesto en a Facultat de Filosofía y Letras d'a Universitat de Zaragoza; pasando en a suya segunda edición y dica l'actualidat a enfilar-se de conchunta con o Concello de Zaragoza por meyo d'a Casa de Choventut Universidat.

Asinas, ha empentau campanyas d'información lingüistica en diferents puestos d'a cheografía aragonesa (Teruel, Uesca, Alcanyiz, Zaragoza...), y tamién ha feito parti d'eventos chunto con atros grupos d'esfensa y amostranza d'a luenga aragonesa (Charraire Fest, Borina por l'aragonés, "Charrar, cantar e chugar", u a "Tardada por l'aragonés" en a Facultat d'Educación de Zaragoza d'entre atras). A iniciativa propia, antimás d'ufrir os suyos cursos de baldes por meyo d'a Casa de Choventú Universidat, l'anyada 2012/2013 O Trango empentó o I Concurso de cuentez y falordietas ta ninos y ninas Araescuela".

Ista asociación remató o suyo treballo por l'aragonés o 13 de mayo de 2014, diya que se dio de baixa en o rechistro d'asociacions d'o Gubierno d'Aragón dimpués d'a celebración d'a correspondient "Asamblea General Extraordinaria".

Vinclos externos