Nombre scientifico

De Biquipedia
Ir ta: navego, busca
Carl von Linné, conoixiu como Linneu, fue o naturalista sueco "pai" de o sistema de nomenclatura scientifica que encara s'emplega en l'actualidat.

En Biolochía, s'emplega nombres scientificos pa denominar de forma inequivoca a os diferents taxons creyaus y clasificaus por a taxonomía y privar asinas as ambiguedatz que presentaría l'uso d'os nombres vulgars de cada idioma y país. Os regles pa creyar nombres scientificos son replegaus en os Codigos Internacionals de Nomenclatura, y en i ha uno pa cada disciplina de a Sistematica.

L'obchectivo d'un nombre scientifico ye obtener una sola denominación que pueda emplegar-se en tot lo mundo, en qualsiquier luenga, pa referir-se a un mesmo taxón. Os nombres scientificos solen estar en latín porque ixa yera la luenga culta y de referencia en a Europa d'o sieglo XVIII, quan principió la revolución scientifica y amaneixió a Biolochía como sciencia.

Cheneralidatz en a formulación[editar | editar código]

Además d'escribir-se en latín, u latinizaus, os nombres scientificos cal que cumplan qualques regles chenerals.

Os nombres de taxons que se trobe en categorías superiors a especie son uninominals; ixo ye, que se forman d'una sola parola. No existe guaires requerimientos más que escribir a inicial d'ixe nombre latino en mayuscula, en qualsiquier que sía la situación. Asinas siempre trobaremos os nombres de reinos, clases, familias, divisions, filos y de demés con a inicial en mayuscula, pero con tipografía convencional: Chordata, Aves, Plantae, Magnoliophyta, Archaea, Felidae, etc.

Chenero[editar | editar código]

Eixemplar d'a obra Species Plantarum ("As especies d'as Plantas") de Linneu, en a qual s'aposentan as bases d'a nomenclatura scientifica.

O libel taxonomico chenero tamién sigue o regle d'uninominalidat (una sola parola por nombre), pero ya presenta una caracteristica particular que no tienen os atros libels superiors: además de inicial en mayuscula, o nombre s'escribe en cursiva quan se fa á maquina u con un ordinador. Por eixemplo: Equus, Accipiter, Sulfolobus, etc. En caso d'escribir-se manualment, se subrayará con una linia.

Especie[editar | editar código]

A especie ye, dende una envista historica y partindo d'a base de que a taxonomía se basa en os treballos de Linneu, o zaguer libel en a hierarquía y tamién o más important. Os nombres d'a categoría especie son siempre binominals. Ixo ye, dos parolas fan parte d'o nombre. A primer parola se considera o nombre chenerico y se corresponde con o chenero a lo qual pertenece ixa especie. En conseqüencia, s'escribirá en cursiva (u subrayau si ye á mano) pero con a inicial siempre en mayuscula.

A segunda parola ye o epiteto u denominador especifico, y ye propio de a especie en qüestión. Como tiene una función adchetivadora NUNCA s'escribe con a inicial en mayuscula, ya que tiene a consideración gramatical d'adchectivo, y no se puede presentar deseparadament de o nombre de chenero. Como tamién a parte chenerica d'o nombre especifico, s'escribe en cursiva.

As subespecies y atras divisions infraespecificas se marcan con una tercer parola, que tamién actúa como adchectivo: Canis lupus familiaris.

Abreviaturas[editar | editar código]

Tanto o nombre chenerico como o nombre especifico pueden abreviar-se si en i ha necesidat, por motivos de contexto textual u pa no fer-se redundants si cal mencionar-los más d'una vegada en o texto. O convenio ye alcurzar o nombre chenerico a la suya inicial (encara en mayuscula) seguida d'un punto, y respectar o regle d'escribir o epiteto especifico como un adchectivo (sin mayuscula): E. asinus, A. nisus.

O nombre especifico s'abrevia más que más por razons de superfluidat, u por desconoiximiento d'a especie concreta quan se cita (p. ex. en o piet d'una imáchen). Alavetz, o que se fa ye escribir o nombre d'o chenero entero y seguindo os regles caracteristicos y, en o puesto d'o epiteto, s'adhibe l'abreviatura sp. u spp., que significa especie (latín species): Sulfolobus sp. u Sulfolobus spp..

Se veiga tamién[editar | editar código]