Nacre
O nacre[1] u nacra[1] ye o revestimento interior de ciertas clascas de molusco, composau de cristals d'aragonita y de conquiolina, con reflexos iridescents. Ye un producto que lo han mirato muito pa decoración, marquetería y a confección de choyas u de botons, dica o punto que ciertos moluscos como os Haliotis han desapareixito localment. Ciertas especies son criatas pa a perla. O nacre resiste millor os acidos que a resta d'a clasca d'o molusco y se reconstruye cuan se fan danyos u foratos en a clasca de l'animal encara en vida.
Cuan un elemento estranio irritant entra a clasca d'estos moluscos, secretan igualment nacre napa dencima de napa pa protecher-se-ne, formando una perla u unas cuantas.
A lo contrario que en atras napas d'a clasca, o nacre ye sintetizato por o molusco en tota a suya vida.
O nacre fa part d'as piedras semipreciosas. En aragonés medieval nacra se deciba en puestos como Zaragoza a tanto a la substancia brillant como a cualsiquier cosa con a suya color[2] (fil de trocetes de nacra, Iacca de nacra). Os mangos d'os cuitiellos sastaguins se feban dica meyatos d'o sieglo XX con nacre d'o bivalvo fluvial Margaritifera auricularia.
Referencias
[editar | modificar o codigo]- ↑ 1,0 1,1 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ J Angel Sesma, Ángeles Líbano Zumalacárregui: Léxico comercial en Aragón (Siglo XV), Institución Fernando el Católico, 1982.
