Muy Ilustre, Antiquísima y Real Hermandad de la Preciosísima Sangre de Nuestro Señor Jesucristo y Madre de Dios de Misericordia

De Biquipedia
Ir a la navegación Ir a la búsqueda
Muy Ilustre, Antiquísima y Real Hermandad de la Preciosísima Sangre de Nuestro Señor Jesucristo y Madre de Dios de Misericordia
Escudo Sangre de Cristo.png
Hermanos de la Sangre de Cristo (Zaragoza).jpg
Chirmans en a capecera d'a procesión d'o Santo Entierro
Información cheneral
Establita Sieglo XIII?
Seu canonica Reyal Capiella de Santa Isabel (Sant Cayetano)
Seu social Plaza d'o Pilar, 16
Cofadres 50 (Sangre de Cristo)
30 (Sección d'o Leito)
20 (Guardia Romana)
Pasos 17 en propiedat
Uniforme Tunica negra y morada, tercerol negro
Web http://www.sangredecristozaragoza.es

A Muy Ilustre, Antiquísima y Real Hermandad de la Preciosísima Sangre de Nuestro Señor Jesucristo y Madre de Dios de Misericordia (en aragonés Mui Iluste, Antiquisma y Reyal Chirmandat d'a Preciocisma Sangre d'o Nuestro Sinyor Chesucristo y Mai de Dios de Misericordia) ye una cofadría d'a Semana Santa zaragozana.

Historia[editar | editar código]

No se sape a calendata exacta d'a fundación d'a chirmandat, anque apareixe documentata en o sieglo XVI ya bi heba seguntes a tradición una capiella propia en a ciudat en l'anyo 1280, por o que puede estar que a chirmandat fuese establita a la fin d'o sieglo XIII u puet que antis.

En 1554 a chirmandat apareixe adscrita a lo Convento de Sant Agostín, os chirmans ya s'encargan de reglamentar as procesions de Semana Santa. Ye en l'anyo 1622 quan s'entregan a la chirmandat os estandartes d'as quatro partis d'o mundo, iste mesmo anyo prencipia probablement a fer-se a procesión d'o Santo Entierro en Zaragoza.

Mientres muitos anyos, y encara huei, a obra social d'a chirmandat ha estato la de recullir os calávers albandonatos d'a ciudat de Zaragoza. Anque ya feban ista misión d'antis mas, ye en l'anyo 1625 quan obtienen o dreito de fer-lo. En 1648 cambean d'adscripción a lo Convento de Sant Francisco y mas tardi en 1677 amaneixen as nuevas ordinacions d'a chirmandat.

Como ta la resta d'a ciudat, a Guerra d'a Independencia espanyola fació una gran desferra ta la chirmandat. A mayor parti d'o suyo patrimonio se destruyó ya que as bombas cayoron sobre o Convento de Sant Francisco lo 10 de febrero de 1809. Atras obras d'arte como lo Santo Cristo d'o Leito recibioron feritas de bala y bayoneta. Dimpués d'a guerra la chirmandat se tresladó ta Santa Isabel de Portugal (Sant Cayetano) estando ista la suya seu actual.

En l'anyo 1819 se produce un litichio con a Venerable Orden Tercera por a organización d'a procesión d'o Santo Entierro. O conflicto se resuelve en favor d'a Sangre de Cristo, que dende 1827, mismo anyo en que Ferrando VII lis da o tetulo de "Reyal", ye a unica congregación que tien dreito a organizar dita procesión. A relación con os reis d'Espanya en iste sieglo ye estreita. En 1860 a reina Isabel II dona a la chirmandat o estandarte reyal, un d'os simbolos mas importants d'ista y en l'anyo 1890 ye o rei Alifonso XIII qui ye feito Chirman Mayor Honorario.

En os anyos 1932, 1933 y 1934 mientres a Segunda Republica, no se celebró a procesión d'o Santo Entierro ya que yera vedato procesionar con o estandarte reyal. En 1937 s'establió a primera cofadría penitencial, filial d'a Sangre de Cristo, a Cofradía de Nuestra Señora de la Piedad y del Santo Sepulcro. Muitas d'as atras cofadrías d'a ciudat de Zaragoza fuoron establitas os siguients anyos tamién como filials d'a Sangre de Cristo y muitos d'os suyos pasos son propiedat d'a chirmandat.

Sección d'o Leito[editar | editar código]

Sección y paso d'o leito

Tampoco se sape muito sobre quan s'establió a Sección d'o Leito, puet estar que a calendata sía o sieglo XII, antis u dimpues d'a formación d'a propia chirmandat d'a Sangre de Cristo, pero se sape que esistiba en a Baixa Edat Meya. Probablement ista sección yera conoixita d'antis mas con o nombre de Chirmandat d'o Santo Sepulcre por lo que podeba tener bella relación con a Orden d'o Santo Sepulcre zaragozana.

En a procesión de 1666 o leito fue levato por os suyos cofadres, por lo que pareixe que existiba independencia entre esta sección y a propia Sangre de Cristo. O documento que mas datos d'a Sección nos da ye a Concordia de 1862 en o que se diz que esdevién una sección d'a chirmandat d'a Sangre de Cristo con a función d'acompanyar a lo Santismo Cristo d'o Leito.

O paso d'o Cristo d'o leito ye un anonimo, de prencipios d'o sieglo XVII u zaguerías d'o XVI. D'estilo barroco, ye una fegura articulata que s'emplegaba d'antis mas en a representación d'a baixata d'a cruz que se feba en a procesión d'o Santo Entierro. Imachen mui venerata en a ciudat, sale totz os anyos rematando a procesión d'o Santo Entierro chunto a los chirmans d'a suya sección d'a Sangre de Cristo y cosirata por a Guardia Romana. Tamién ha salito a las carreras de Zaragoza por atros motivos, relacionatos a sobén con sequeras u epidemias como en os anyos 1661, 1713, 1748, 1868, 1885 y 1976.

En a Guerra d'a Independencia, mientres o segundo setio de Zaragoza fue rescatato por bells ciudadans d'as ruinas d'o Convento de Sant Francisco dimpués de que iste fuese bombardiato y se tresladó ta o Palacio Arcebispal y dimpués ta la Basilica d'o Pilar. En 1810 se treladó ta la Ilesia d'a Santa Cruz y o 24 d'aviento de 1813 ta Santa Isabel, a on ye actualment.

En 1909 o Cristo d'o Leito ye nombrato Heroe d'os Setios de Zaragoza con motivo d'o primer centenario d'os Setios.

Guardia Romana[editar | editar código]

Guardia Romana

No se conoixe a calendata d'establimiento d'a Guardia Romana d'a Sangre de Cristo, pero en a procesión d'o Santo Entierro de 1700 ya saliban seis guardias armatos. Entre os anyos 1860 y 1970 tamién saliba a Guardia Pretoriana, diferent d'a Romana, costodiando a lo paso de "Jesús con la Cruz a Cuestas".

A suya misión ye cosirar o Santísmo Cristo d'o Leito quan ha de salir a las carreras d'a ciudat por qualsiquier motivo, habitualment en a procesión d'o Santo Entierro y tamién quan a imachen ye fuera d'a suya capiella en a ilesia de Santa Isabel de Portugal. En l'anyo 1913 tamién salioron en o Santo Entierro los "Equites" u Guardia Romana a caballo.

Pasos[editar | editar código]

Un total de 16 pasos son propiedat d'a chirmandat. No totz os pasos salen en procesión. O Cristo d'o leito sale zarrando a procesión d'o Santo Entierro, atros 11 apareixen en ista procesión y en atras menors levatos por atras chirmandaz un cofadrías y os atros 5 pasos no salen actualment en denguna procesión:

Uniforme y emblema[editar | editar código]

Cada una d'as seccions tiene o suyo propio habito:

  • Chirmans d'a Sangre de Cristo: Tunica y tercerol, que no cubre a cara, negros. Cuello y mangas de tierzopelo morato. Centuron morato con debilla de plata y o emblema d'a chirmandat.
  • Sección d'o leito: Levan tunica con tierzopelo en cuello y mangas y tercerol negros, con a cara tapata. Camisa blanca y corvata negra y centurón con a cruz d'o Santo Sepulcre.
  • Guardia romana: Uniforme d'o exercito román: casco con penacho, coraza, faldeta y capa royas. En as mans espata y escuto romans con a leyenda "LEG VIII".

O emblema d'a chirmandat ye a cruz de Chesús con a sabana en os suyos brazos sobre o Mont Calvario. Sobre a cruz a Corona d'Espinas y refirmatos en os suyos brazos a lanza y a esponcha. A sección d'o leito tien o suyo propio emblema que ye o mesmo d'a Sangre de Cristo con una cruz d'o Santo Sepulcre.

Vinclos externos[editar | editar código]


 
Cofadrías de Zaragoza
Cajaclara.svg

Calvario · Columna · Coronación · Crucifixión · Descendimiento · Despojado · Dolorosa · Ecce-Homo · Entrada · Esclavas · Eucaristía · Exaltación · Huerto · Humildad · Humillación · Llegada · Nazareno · Piedad · Prendimiento · Resucitado · Sangre de Cristo · Siete Palabras · Silencio · Verónica