Musa × paradisiaca

Este articlo fa referencia a lo chenero de plantas Musa, os plataners. Ta altros emplegos d'a palabra se veiga Musa.

*Musa × paradisiaca*
Platanero
Denominacions populars
platanero / plataner, bananera
Clasificación cientifica
Reino:	Plantae
División:	Magnoliophyta
Clase:	Liliopsida
Orden:	Zingiberales
Familia:	Musaceae
Chenero:	Musa (chenero)
Especie:	Musa × paradisiaca

O platanero^[1]^{[nota 1]} u bananera^[1] (nombre cientifico Musa × paradisiaca) ye una especie d'árbol dintro d'o chenero Musa, d'orichen tropical, que comprende bella cincuantena d'especies de megaforbas con una taxonomía confusa. A palabras platano y banana sinyalan la fruita caracteristica d'istos árbols.

Son plantas herbacias de grans dimensions, procedents d'o sud-este d'Asia, que como pasa con as graminias forman un pseudotallo feito con as vainas d'as fuellas. Os suyos xilema y floema son establitos de maniera radial en a part lenyosa d'o tranco, que ye vuedo per dintro, formando un sistema de vasos conductors asociatos en faixos que en sección forman circlos concentricos repartitos per o perimetro d'o tallo. A part interna, como pasa con as canyas y graminias, tien un forato interior.

Son plantas monocotiledonias, y seguntes cualques expertos, s'ha quiesto considerar que las especies vechetals mes amparatas filocheneticament podrían estar-ne as graminias.

Os plataners son caultivatos en diferents puestos de latituz tropicals arredol d'o mundo. En a Peninsula Iberica se caultiva esporadicament como planta ornamental de chardín en o litoral mediterranio, estando-le bien deficil de fructificar pus precisan temperaturas que anque en ixes países gosan mantener-se prou altas ta que la planta soprevisca, no en están prou como ta que organos tan finos y delicatos como son as flors i aguanten. As Islas Canarias son lo solo puesto d'Espanya a on que lo clima i permit que se i caultiven productivament.

A fruita: o platano

Cal decir que totas as bananas d'importación se recullen verdas y que son afectatas per as temperaturas con as que finalment maduran defuera d'a bananera. En o transporte son refricheratas d'entre de 13,5 dica 15 °C, si las temperaturas son inferiors os fruitos se tornan grisos.

O contenito calorico ye similar a lo d'a trunfa, bellas 80 a 100 calorías per 100 gramos (peso aproximato d'un platano meyo), y tien o dople de calorías que la manzana, pero no deixan d'estar relativament baixas en calorías y aptas ta estar incluitas en dietas d'adelgazamiento.

O contenito en zucre ye d'un 12 % y lo de proteínas de bel 1% en variedaz de postre. As graixas son muito escasas, bel 0,3% d'a fruita. A fibra dietetica s'agosa dica bel 2,6%.

Tien bels 358 mg de potasio y 9 mg de vitamina C per cada 100 gramos.

En a Republica Dominicana, se fa servir a banana ta fer o que allá se clama "mangú", que no ye cosa que una banana esclafata con manteca y aceit, de vegatas i afechan zucre ta rebaixar-lo, y se i adhibe sal a lo gusto.